VI Baký halyqaralyq kitap kórme-jármeńkesi aiasynda Ázerbaijannyń M.F.Ahýndov atyndaǵy Ulttyq kitaphanasynda Qazaqstan ádebiet jáne mádeniet ortalyǵy ashyldy, dep habarlaidy "Ult aqparat".
Halyqaralyq jobanyń maqsaty - Qazaqstan halqynyń tarihy men mádenieti, salt-dástúrleri, ekonomika, saiasat, áleýmettik saladaǵy jetistikteri, klassikalyq jáne qazirgi zamanǵy proza men poeziianyń ádebi qory jaily bilim taratý.
Ortalyqtyń ashylý saltanatyna G.Áliev atyndaǵy qordyń vitse-prezidenti Leila Álieva, Ázerbaijannyń Mádeniet ministri Abýlfas Garaev, TÚRKSOI-dyń bas hatshysy Dúisen Qaseinov, Qazaqstannyń Ázerbaijandaǵy ýaqytsha senimdi ókili Darhan Kósherbaev, M. Ahýndov atyndaǵy Ulttyq kitaphananyń direktory Kerim Tahirov, Qazaqstan Ulttyq akademiialyq kitaphanasy basshysynyń orynbasary Áliia Qojabekova, Ázerbaijanda tirkelgen diplomatiialyq missiialardyń ókilderi, sheteldik kitaphanalardyń basshylary, mádeniet qairatkerleri men BAQ ókilderi qatysty.
Ortalyqta Elbasy Nursultan Nazarbaevtyń qyzmeti, onyń halyqaralyq saiasi arenadaǵy róli týraly kitaptary, sonymen qatar belgili qazaqstandyq avtorlardyń qazaq, orys jáne aǵylshyn tilderindegi jumystary qoiyldy. Kitaphanaǵa barlyǵy 200-den astam kitap syiǵa tartyldy. Bul kitaptar oqyrmandardyń qyzyǵýshylyǵyn arttyryp, qazaq halqynyń mádeni qundylyqtarymen jaqynyraq tanysýǵa múmkindik beredi.
Aita keterligi, 2016 jyldan bastap QR Mádeniet jáne sport ministrliginiń qoldaýymen Nur-Sultandaǵy QR Ulttyq akademiialyq kitaphanasy QR Syrtqy ister ministrligi men elshilikterimen birlesip, shet elderdiń ulttyq jáne basqa da iri kitaphanalarynda qazaq ádebieti men mádenieti ortalyqtaryn ashý jónindegi halyqaralyq jobany júzege asyryp keledi.
Búgingi tańda qazaq ádebieti men mádenieti ortalyqtary álemniń 32 kitaphanasynda ashylǵan. Iaǵni, Ońtústik Koreia, Qyrǵyz Respýblikasy, Finliandiia, Vengriia, Resei, Armeniia, Malaiziia, Túrkiia, Qytai, Grýziia, Frantsiia, Japoniia, Shvetsiia, Makedoniia, Bolgariia, Chehiia, Italiia, AQSh (Kongress kitaphanasy jáne Niý-Iork kópshilik kitaphanasy), Rýmyniia, Iran, Braziliia, Ýdmýrtiia, Germaniia jáne taǵy basqa elderde qazaq ádebieti men mádenieti ortalyqtary jumys istep tur.
