Beisenbi kúni Meksika shyǵanaǵyndaǵy jaǵalaýda «Laýra» daýyly soǵyp, sonyń saldarynan Lýizianadaǵy zaýytta hlor aýaǵa tarap ketti, dep habarlaidy Independent saity.
Lýiziana himiia zaýytynda joǵary ýytty hlordyń tarap ketýine bailanysty turǵyndarǵa terezeler men esikterin jaýyp, sondai-aq konditsionerdi óshirip, úide bolýǵa keńes berildi. Zaýytta memlekettik politsiia qyzmetkerleri jumys istep jatyr.
Bul jaǵdai AQSh-tyń Lýiziana shtatynyń batys bóligindegi Ýestleik qalasyndaǵy «BioLab» himiialyq elementterin shyǵaratyn kásiporynda oryn alǵan.
«Fox» arnasynyń meteorology Bred Soýder óziniń Tvitterinde jaǵdaidy «asa qaýipti» dep baǵalaǵan.
Áleýmettik jelilerdegi beinejazbalarda zaýyttyń ústinde seiilmei turǵan bultty kórýge bolady. AQSh-tyń Meksika shyǵanaǵynyń jaǵalaýynda munai-himiia salasynyń taǵy birneshe kásiporny ornalasqan.
«BioLab» zaýyty 1979 jyly salynǵan jáne trihlorizotsianýr qyshqylyn, hlorlaityn túiirshikterdi jáne turmystyq tazartqyshtarda qoldanylatyn basqa da himiialyq zattardy óndirýge mamandandyrylǵan. Bul ónimder adamdar men janýarlardyń aǵzasyna túsken jaǵdaida qaýipti.
«BioLab» zerthanasy tiesili «KIK Custom Products» kompaniiasynyń ókili kompaniia zaýyttarynyń birinde órttiń áli sóndirilmegenin habarlady. Sondai-aq qazirgi tańda Leik-Charlz qalasy turǵyndarynyń qaýipsizdigi men ál-aýqaty basty orynda ekenin de atap ótti.
Apat oryn alǵan zaýytqa arnaiy top jiberildi. Olarǵa jedel áreket etý, jergilikti basqarý jáne tabiǵat qorǵaý mekemeleriniń qyzmetkerleri de qosyldy.
«Laýra» daýyly saǵatyna 70 mil jyldamdyqtaǵy tropikalyq daýylǵa deiin álsiredi. Daýyl beisenbi kúni tańerteń AQSh-tyń Meksika shyǵanaǵynyń jaǵalaýynda saǵatyna 150 mil jyldamdyqpen soǵyp bastaǵan bolatyn.
