Foto: qazaquni.kz
QR Ǵylym jáne joǵary bilim ministrligi Til saiasaty komitetiniń tóraǵasy Erbol Tileshov latyn qarpine aýysý boiynsha qandai jumystar júrgizilgenin aityp berdi, dep habarlaidy QazAqparat agenttigi.
«Qazirgi latyn grafikasy boiynsha joba daiyn. Bul joba birneshe saraptaýdan ótti. Respýblikanyń 5 óńirinde – Astana, Almaty qalalarynda, Shyǵys Qazaqstan, Aqmola, Qaraǵandy oblystarynda álipbige bailanysty oqýshylarǵa, jastarǵa, memlekettik qyzmettegi eresek adamdarǵa saraptama jumystary júrgizildi. Orforgrafiialyq jumys tobynda otyzǵa jýyq ǵalym bar. Olar elimizdiń joǵary oqý oryndarynan kelgen, osy salanyń mamandary. A. Baitursynuly atyndaǵy til bilimi institýty emle erejesin daiyndady. Osy aidyń sońynda nemese kelesi aidyń basynda arnaiy qurylǵan komissiia latyn álipbii jobasyn qaraidy», - dedi Erbol Tileshov QR Prezidenti Is basqarmasynda «Memlekettik til – tatýlyq negizi» atty dóńgelek ústelde.
Ǵalymnyń aitýynsha, latyn qarpine qai jyly kóshetinimizdi naqty aitý qiyn.
«Qoǵamda «latyn álipbiin ázirleýshiler únsiz qaldy, qabyldanbaityn boldy ma?» degen áńgimeler bar, ony áleýmettik jeliden oqyp júrmiz. Anyǵynda olai emes, daý-damaisyz, osyndai ádistemelik-zertteý jumystary júrip jatyr. «Y» men eki «I»-diń tańbalanýy boiynsha ǵalymdar arasynda pikir qaishylyǵy áli bar. Árine, Ahmet Baitursynov belgilegen 28 tańbamen shyǵýǵa bolar edi, biraq til de jahandanýsyz tura almaidy. Tilimizge syrttan engen «V», «F», «H» dybystaryn qaldyrý kerek pe, qaldyrmasaq «fýtbol» sózin qalai atap, qalai jazamyz degen másele bar. Áripti qaldyrý syrt kózge ońai kóringenimen, bári emle erejesine sai kelýi kerek. Sondyqtan ǵylymi-saraptaý jumystaryn kúsheitip jatyrmyz», - dedi Erbol Tileshov.
Aita keteiik, latyn álipbiine kóshý taqyryby 2017 jyly kóterile bastady.
Sol jyly 26 qazanda «Qazaq tili álipbiin kirillitsadan latyn grafikasyna kóshirý týraly» Prezident Jarlyǵy shyqty.
Byltyr Ulytaý oblysynda ótken Ulttyq quryltaida Prezident Qasym-Jomart Toqaev latyn álipbiine kóshýde jan-jaqty, tereń taldaý jasap baryp, túbegeili sheshim qabyldaý keregin aitqan edi.
