Qazaqstannyń eńbek sińirgen jattyqtyrýshysy, Erler arasyndaǵy halyqaralyq grossmeiter Jansaia Ábdimáliktiń anasy Alma Áshirova Gibraltar týrnirindegi jeńisten keiingi áseri týraly aitty, dep habarlaidy QazAqparat.
«Sportshydan qaraǵanda ata-anasynyń qýanyshy 100 ese kóp bolatyn shyǵar. Jansaia týrnirdi aiaqtaǵannan keiin ekeýmiz sóilesip otyrǵanda men qyzyma osy shaqtyń árbir sátin, árbir minýtyn esime saqtaǵym keletinin aitqan edim. Keýdemdi maqtanysh sezimi kernep turdy. Ony sózben jetkizý múmkin emes. Jai ǵana otyryp, sol qýanyshty sáttegi kúiimdi esime saqtaýǵa tyrystym. Onyń tarihi jetistigi sonshalyqty úlken. Ár azamat óziniń ómirlik isinde artynda iz qaldyrǵysy keletin shyǵar. Qyzymnyń tarihi jetistigi shynymen de orasan», - dedi bapker ortalyq kommýnikatsiialar qyzmetinde ótken brifingide.
Shahmatshynyń anasy týrnirde kileń myqty qarsylastar jinalǵandyqtan, ýaiym kóp bolǵanyn da eske aldy.
«Men barlyq qazaqstandyq analarǵa shyn júrekten osyndai baqytty shaqty bastan keshirýdi tileimin. Osyndai sátter bizdiń ómirimizdi uzartatyn bolsa kerek. Ákesi úige kelgende ómirińe neshe jyl qosyp keldiń dep ázildedi. Men «Óte kóp jyl qosyp aldym» dep jaýap berdim. Týrnirdiń ózi qobaljýǵa toly boldy. Al qorytyndysy búkil ýaiym men qobaljýdy umyttyryp jiberdi. Ananyń baqyty barlyq jeńiske laiyq shyǵar. Búkil analar osyndai baqytqa kenelsin», - dep túiindedi Alma Áshirova.
