Bilim berý salasy qyzmetkerleriniń dástúrli tamyz keńesinde aimaqtyń úzdik muǵalimderi marapattalyp, úzdik mektebi anyqtaldy. Oqý jylynyń qorytyndysy boiynsha «Murager» mektebi úzdik dep tanylyp, mektep basshysyna 17 millionnyń sertifikaty tabystaldy.
Búgin Qyzylordada «Tórtinshi ónerkásiptik revoliýtsiia jaǵdaiyndaǵy adami kapital» taqyrybynda pedagogikalyq tamyz keńesi ótti.
Sharaǵa oblys ákimi Qyrymbek Kósherbaev, Qazaqstan Respýblikasy Bilim jáne ǵylym ministrliginiń jaýapty hatshysy Aryn Órsariev, «Nazarbaev Ziiatkerlik mektepteri» derbes bilim berý uiymynyń basqarma tóraiymy Kúlásh Shamshidinova, Bilim jáne ǵylym ministrligi janyndaǵy aqparattyq taldaý ortalyǵy prezidentiniń mindetin atqarýshy Eldos Nurlanov, jergilikti bilim berý uiymdarynyń qyzmetkerleri men oblys muǵalimderi qatysty. Qyzylorda oblysy bilim basqarmasynyń basshysy Maira Meldebekova moderator boldy.
Kezdesýde oblys ákimi Qyrymbek Kósherbaev zamanaýi bilim berý júiesindegi mańyzdy máseleler men problemalardy atap ótti.
«Jańǵyryp jetilýdiń múlde jańa, mazmundyq jáne sapalyq turǵydan burynǵydan bólek, áldeqaida biik satysyna kóterilýge umtylǵan elimizge jasampaz, bilikti, ózgeristerden qoryqpaityn mamandar qajet. Bul Elbasynyń tujyrymy, naqty tapsyrmasy, bilim salasyn uiymdastyrýshy Siz ben Bizge amanaty! Adami kapital, eń aldymen, bilim berý salasy arqyly qalyptasady. Ony qalyptastyrýdaǵy bilim salasynyń úlesi kez-kelgen basqa saladan áldeqaida joǵary. Sondyqtan da, bul salany áleýmettik qamsyzdandyrý, zeinetaqy júiesi, memlekettik basqarý, qorǵanys jáne qaýipsizdik siiaqty shyǵyndy kóp talap etetin salalarmen bir qatarǵa qoimai, kerisinshe, mol qosymsha qun qalyptastyratyn investitsiialyq sala retinde qaraý qajet. Bilim berýge investitsiia tartý jekelei adam men tutas memleket úshin de ońtaily sheshim bolyp tabylady», - dedi aimaq basshysy.
Sonymen qatar, aimaq basshysy bilim alýshylardyń mamandyqtary men eńbek naryǵy suranysynyń sáikes kelýi mańyzdylyǵyn aitty.
«Osy rette, bizdiń udaiy nazarda ustaityn erekshe mańyzdy kórsetkishimiz – túlekterimizdiń jumyspen qamtylýy. Moiyndaý qajet, bizde bul máselede keleńsizdikter az emes. Túlekterdi bir mamandyq boiynsha daiarlaimyz, al olar múlde basqa saladan oryn tabady. Olardyń qabileti men naryqtaǵy jaǵdaidy eskere otyryp, túlekterdi durys baǵyttaý – bizdiń mindetimiz», - dedi aimaq basshysy.
Aimaqta bilim berý salasynyń mektepke deiingi kezeńinen bastap joǵaryǵa deiin júieli jumystar júrgizilip jatqanyn aita ketý kerek. Osyǵan orai, oblysta mektepke deiingi qamtylý deńgeii júz paiyzdy qurap, úsh aýysymda oqityn mektepter joiylǵan. Bir ǵana Jalaǵash aýdany M.Shámenov aýylyndaǵy №34 orta mektebinen basqa, apattyq jaǵdaidaǵy mektepter joq. Sońǵy 5 jylda óńirde 37 apattyq mekteptiń ornyna 45 mektep salynǵan.
2014 jyldan bastap Máskeý men Sankt-Peterbýrgtiń ozyq oqý oryndaryna 452 qyzylordalyq stýdent Resei federatsiiasy úkimetiniń granty esebinen bilim alýda. Biyl alǵashqy 65 túlektiń jumyspen qamtý máselesi sheshimin tapty. Sonymen birge, syrboiylyq jastarǵa mamandandyrylǵan «Kiberqaýipsizdik» jáne «Protsesterdi matematikalyq modeldeý» salasynda M.V.Lomonosov atyndaǵy Máskeý Memlekettik ýniversitetine jyl saiyn 20 grant bólinedi. Budan basqa, Eýraziialyq ekonomikalyq qoǵamdastyqtyń Parlamentaralyq Assambleiasy aiasyndaǵy joǵary oqý oryndarymen yntymaqtastyq týraly memorandýmǵa qol qoiyldy. Joǵary oqý oryndaryna túsý emtihandaryn úzdik tapsyrǵan Qyzylorda oblysy mektepteriniń túlekterine jyl saiyn Sankt-Peterbýrgta oqýǵa 10 bilim grantyn bóletin boldy. Aqparattandyrý men tehnologiialardy engizý boiynsha Tatarstan Respýblikasyndaǵy Innopolis ýniversitetinde aqparattyq jáne sandyq tehnologiialar boiynsha jyl saiyn taǵy 20 túlektiń bilim alýyna Tatarstan Prezidentimen kelisim jasalǵan.
Sonymen qatar, UBT tapsyryp memlekettik grantty alýǵa birneshe ball jetpei qalǵan aýyl mektepteriniń túlekterine aimaqqa qajetti mamandyqtar úshin oblys ákiminiń granty bólinedi.
«2013 jyldan bastap, jyl saiyn 100 daryndy ári talapty aýyl balalary, onyń ishinde, az qamtylǵan jáne kóp balaly otbasynan shyqqan jastardy elimizdiń beldi joǵarǵy oqý ornyna oblys ákiminiń grantymen oqýǵa joldaýdamyz. Biylǵy jyly oqý grantynyń sanyn 100-den 205-ke deiin, iaǵni 2 esege ulǵaittyq. Osylaisha, búgingi tańda grant iegerleriniń sany 900 adamǵa jetti. Biylǵy ulttyq biryńǵai testileýdiń qorytyndysy boiynsha oblys túlekteriniń ortasha kórsetkishi 85,2 baldy qurady. Bul byltyrmen salystyrǵanda 2,42 balǵa joǵary. Byltyrǵy jyldyń qorytyndysy boiynsha túlekterdiń 97 paiyzy joǵary jáne orta arnaýly oqý oryndaryna oqýǵa túskeninin maqtanyshpen atap ótýge bolady. Biylǵy jylǵy nátije de jaqsy bolady dep úmittenemiz»,- dedi aimaq basshysy.
Jiynda Aryn Órsariev, Kúlásh Shamshidinova, Eldos Nurlanov, Maira Meldebekova jáne Qyzylorda oblysy Kásipkerler palatasynyń direktory Ǵalymbek Jaqsylyqov baiandama jasady.
Kezdesýge qatysýshylar bilim berý júiesin jańǵyrtý boiynsha usynystaryn bildirdi jáne Qyzylorda oblysyndaǵy bilim berýdiń barlyq kezeńderi qarqyndy damyp jatqanyn atap ótti. Sharada Resei ýniversitetiniń túlekteri men ata-analary sóz sóiledi.
Birqatar oqytýshylar «Qazaqstan Respýblikasy bilim berý isiniń qurmetti qyzmetkeri» tósbelgisine ie boldy, «Ybyrai Altynsarin» medalimen, sondai-aq oblys ákiminiń Qurmet gramotalary jáne alǵys hattarymen marapattaldy. Sonymen qatar, «Murager» mektebine «Úzdik orta bilim uiymy» nominatsiiasy boiynsha 17 million teńge tabystaldy.
2018-2019 oqý jylynda oblystyń 294 jalpy bilim beretin mektebinde 154 559 oqýshyny oqytý josparlanyp otyr. 18 942 bala birinshi synypqa barady.
Jańa oqý jylynda Qazaly jáne Jańaqorǵan aýdandarynda 300 orynǵa arnalǵan jańa mektepter paidalanýǵa berildi. 2017-2018 oqý jylynda oblysta Qarmaqshy jáne Jańaqorǵan aýdandarynda 3 mektep jumysyn bastaǵan bolatyn. Budan basqa, jyldyń sońyna deiin Aralda 300 orynǵa jáne Qyzylordada 600 orynǵa arnalǵan mektepter salynady.
