Qyzylordada kúrishtiń jańa sorty óndiriske engizildi. Syr diqandary biyl «Syr sulýy» sortyna alǵash ret oraq saldy, dep habarlaidy "Ult aqparat".
Tuńǵysh Prezident - Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna joldaýynda agroónerkásip kesheniniń áleýetin tolyq iske asyrý qajettigi atap kórsetilgen.
Atalmysh sortty Qyzylorda qalasyndaǵy Y. Jaqaev atyndaǵy Qazaq kúrish ǵylymi-zertteý institýtynyń ǵalymdary shyǵarǵan. Jańa sort biyl tuńǵysh ret óndiriske engizildi. «Syr sulýy» Jalaǵash aýdanyndaǵy «Tań LTD» sharýashylyǵyndaǵy 8 gektar alqapqa egildi.
Institýt ǵalymdary bul sorttyń tuzdylyqqa jáne tómengi temperatýraǵa tózimdiligin aitady. Konkýrstyq sort synaǵy barysynda onyń ónimdiligi gektaryna 70-80 tsentnerdi shamalady. Nátijesinde standartty deńgeiden 4-7 gektarǵa deiin artyq ónim berdi. Eń joǵary ónim túptený fazasynyń basynda jáne aiaǵynda azot tyńaitqyshymen ústep qorektendirgende alyndy. Ǵalymdar «Syr sulýy» sortyn elimizdiń kúrish ósiretin barlyq aimaǵynda óndiriske engizýge bolatynyn aitady. Bul sort aýa raiynyń qolaisyz jaǵdaiy men topyraq ereksheligine de tózimdi. Sondyqtan ony óńirdiń barlyq kúrish sharýashylyǵynda ósirýge bolady. Sol arqyly turaqty ónim alýǵa barlyq múmkindik bar. Ónim sapasy da kóńilden shyǵady.
«Biyl kúrishtiń «Syr sulýy», «Áigerim» sorttaryn egýdi bastap kettik. Bul sorttardyń ózge kúrish jáne reseilik sorttarynan kóptegen artyqshylyǵy bar. Aldaǵy jyly Syr óńirinde egiletin kúrish alqabynyń 20-25 paiyzyn otandyq jańa sorttarmen qamtamasyz etemiz. 2021 jylǵa deiin olardyń aýqymyn 50-55 paiyzǵa deiin arttyrý mejelenip otyr», - dedi Y. Jaqaev atyndaǵy Qazaq kúrish ǵylymi-zertteý institýty bas direktorynyń mindetin atqarýshy Áset Toqtamysov.
Syr óńirinde sońǵy ret jergilikti kúrish sorty 1983 jyly óndiriske engizilgen. Sol kezeńde qyzylordalyq diqandar «Marjan» sortynan egip, odan mol ónimge negiz qalaǵan edi.
