Qyzylorda oblysy Qarmaqshy aýdanynda jasóspirimder arasynda jappai tóbeles boldy, dep habarlaidy QazAqparat.
Oqiǵa búgin, 27 tamyzda saǵat 19.00 shamasynda Qarmaqshy aýdanynyń ortalyǵy - Josaly kentiniń shetki aimaǵynda tirkelgen. Sol aýmaqta jasóspirimder arasynda kelispeýshilik týyndap, olardyń arasynda janjal bolǵan.
«Áleýmettik jelilerge júrgizilgen monitoring barysynda bir top jasóspirimniń arasynda týyndaǵan janjal týraly beinejazba anyqtaldy. Tekserý barysynda oqiǵanyń Qarmaqshy aýdanynda bolǵandyǵy naqtylandy. Aýdandyq politsiia bóliminiń qyzmetkerleri oqiǵa ornyna jedel jetip, jasóspirimderdi taratty. Zardap shekkender joq. Buǵan bailanysty aýdandyq politsiia bólimine eshqandai aryz-shaǵym túsken joq», - dep málim etti Qyzylorda oblystyq politsiia departamentinen.
Vedomstvo málimetinshe, atalǵan derek boiynsha QR Qylmystyq kodeksiniń 293-baby (Buzaqylyq) boiynsha sotqa deiingi tergep-tekserý amaldary bastaldy. Oqiǵanyń mán -jaiy anyqtalýda.
