Foto: Aqorda
Búgin Qyzylordada Memleket basshysy Qasym-Jomart Toqaevtyń qatysýymen Ulttyq quryltaidyń besinshi otyrysy bastaldy, dep habarlaidy Ult.kz.
Quryltaidaǵy talqylaýǵa tanymal memleket jáne qoǵam qairatkerleri, saiasi partiialardyń, úkimettik emes sektordyń, biznes-qaýymdastyqtardyń, saraptamalyq qaýymdastyqtyń jáne oblystardyń qoǵamdyq keńesteriniń ókilderi keldi.
Memleket basshysy Quryltaida sóilegen sózinde ótken jyldy eldiń birliginiń arqasynda tabysty aiaqtaǵanyn aityp, ekonomikalyq jáne áleýmettik kórsetkishterge toqtaldy.
Prezidenttiń aitýynsha, 2025 jyly Qazaqstan ekonomikasy 6,5%-ǵa ósti. Eldiń ishki jalpy ónimi 300 milliard dollardan asty, al jan basyna shaqqandaǵy kórsetkish Táýelsizdik tarihynda alǵash ret 15 myń dollarǵa jetti. Bul – búkil Ortalyq Aziia boiynsha rekordtyq nátije.
Ulttyq qordyń valiýtalyq aktivteri 5 milliard dollarǵa ulǵaiyp, altyn-valiýta qory 65 milliard dollardan asty. Shaǵyn jáne orta biznestiń ekonomikadaǵy úlesi 40%-ǵa jaqyndaǵan. Halyq sany 20,5 millionǵa jýyqtady, al azamattardyń ortasha ómir súrý uzaqtyǵy 75,4 jasqa jetti.
Memleket basshysy qoǵamdaǵy ózgerister men reformalardyń turaqty sipatqa ie bolǵanyn, halyq sana-seziminde úlken betburys oryn alǵanyn atap ótti.
Sonymen qatar Qasym-Jomart Toqaev Ulttyq quryltaidyń el ómirindegi rólin erekshe atap, tórt jyl ishinde quryltai músheleriniń mańyzdy bastamalar kótergenin, onyń nátijesinde 26 zań qabyldanǵanyn jetkizdi.
«Áielderdiń quqyǵy men balalardyń qaýipsizdigin qamtamasyz etý, lýdomaniia men nashaqorlyqqa qarsy kúres, onomastika salasyndaǵy jumystar, memlekettik nagradalar júiesin jańartý – barlyǵy quryltaidyń belsendi bastamalarynyń nátijesi», – dedi Prezident.
Memleket basshysy ulttyń jańa sapasyn qalyptastyratyn qundylyqtardy aiqyndaǵanyn, urpaqqa ziian keltiretin keselderge tosqaýyl qoiǵanyn jáne ishki saiasat salasyn retke keltirý baǵytynda tiisti qujattardy belsendi iske asyrý kerektigin málimdedi.
