Qyzylorda qalasyndaǵy Nazarbaev Ziiatkerlik mektebinde oqityn úndi qyzy Aishani Dattatreia qazaq ánderin erekshe jaqsy kóredi. Qazaqstanda dúniege kelgen ol Abai óleńderine jazylǵan ánderdi erekshe shabytpen shyrqaidy, dep habarlaidy QazAqparat.
Aishanidiń mýzykaǵa qyzyǵýshylyǵy erekshe. Kóp jaǵdaida orys, ýkrain, aǵylshyn, frantsýz, hindi jáne qazaq tilindegi ánderdi oryndaidy.
«Eń unaityny - qazaq halqynyń ánderi. Olar óte áýendi jáne tereń maǵynasy bar. Jaqsy isterge, ómirge qýanýǵa jáne bir-birimizdi syilaýǵa shaqyrady. Ony kópshilikke nasihattaýǵa óz septigimdi tigizgim keledi», - deidi Aishani.
Onyń ákesi - Hallimaisor Dattatreia úndi ultynyń ókili. Ata-anasy Almatyda bir-birin keziktirgen. Búginde Qazaqstanda 18 jyldan astam ýaqyt tatý-tátti ómir súrip keledi.
«Qazaqtar - óte keń júrekti, baýyrmal halyq. Yntymaǵy jarasqan eldiń bir bóligi bolǵanyma qýanamyn», – dep oiyn bólisti Hallimaisor Dattatreia.
Bul otbasyndaǵy barlyq adam ónerge jaqyn. Úlkenderi de vokalmen ainalyssa, balalary mýzykalyq aspapta oinaýdyń sheberi. Degenmen Dattareia otbasyndaǵy basty qaǵida - bilimge erekshe den qoiý. Búginde Aishani men aǵasy Radjiv óńirdegi Ziiatkerlik mekteptiń ozat oqýshylary. Keleshekte Aishani ǵylymnyń syryn ashyp, ataqty biolog ǵalym bolýdy armandaidy.
