Búgin Qyzylordada ótken «Ózińe sene basta» kórme-baiqaýynda Jańaqorǵan aýdanynyń turǵyny Oral Qasiet Qaldybaiqyzy jeńimpaz atandy. Bul shara múmkindigi shekteýli kásipkerler úshin Qyzylorda oblysynda jappai kásipkerlikti damytýdyń úsh jyldyǵy (2018 - 2020 jj.) aiasynda uiymdastyrylyp otyr.
Kásipkerler úiinde oblystyq «Ózińe sene basta» atty múmkindigi shekteýli kásipkerlerdiń ónimderinen oblystyq kórme-baiqaýy ótti. Sharaǵa ártúrli salada kásipkerlikpen ainalysyp júrgen barlyǵy 50 adam qatysty.
Baiqaý barysynda qatysýshylardyń aǵash, toqyma, sýret, taǵam men kóptegen basqa da ónimderinen kórme uiymdastyryldy.
Oblys ákimi Qyrymbek Kósherbaev sharaǵa qatysyp, baiqaý jeńimpazdary men qatysýshylaryn marapattady.
«Jumyspen qamtý kez kelgen memleket úshin qashanda ózekti máselelerdiń biri bolyp tabylady. Al azamattardy jumyspen qamtýdyń balamasy ol - kásipkerlik. Búgin múmkindigi shekteýli kásipkerlerdi qoldaý ári olardyń damýyna jol ashý maqsatynda «Ózińe sene basta» kórme-baiqaýyn ótkizip otyrmyz.Qatysýshylar - taǵdyr taýqymetine qaramastan, qoǵamda óz ornyn taýyp, ózin jumyspen qamtyp, tipti ózgelerge jumys taýyp bergen azamattar. Olar kópke úlgi bolýǵa laiyqty jáne qoǵamdy masyldyq kózqarastan aryltýǵa septigin tigizedi»,- dedi aimaq basshysy.
Baiqaý jeńimpazdaryn oblystyq máslihat depýtattary, «Nur Otan» partiiasy oblystyq filialynyń ókilderi, kásipkerler palatasynyń músheleri, «Damý» qory men áleýmettik qorǵaý uiymy qyzmetkerlerinen qurylǵan komissiia anyqtady.
Sonymen, baiqaýdyń jeńimpazy «Kádesyi jasaý jobasymen Jańaqorǵan aýdanynan qatysqan Qasiet Oral oblys ákiminiń alǵys haty men 1 million teńgege ie boldy. Ekinshi oryn iegeri, «Aiaqkiim jasaý» jobasymen Qarmaqshy aýdanynan qatysqan Erlibek Jarmahanov 700 myń teńgemen, úshinshi oryn iegeri «Káriz júieleri ónimi, temir jáne sýret buiymdary» jobasymen Qyzylorda qalasynan qatysqan Ertohaev Aslan 500 myń teńge syiaqymen marapattaldy. Sonymen qatar, baiqaýdyń barlyq 50 qatysýshysy da gramota men turmystyq tehnikalyq taýarlar sertifikatyna ie boldy.
«Birneshe jyl buryn jaqyndarymnyń kómegimen kádesyi jasaýmen ainalysa bastadym jáne kásipkerlikti qoldaýǵa baǵyttalǵan túrli memlekettik baǵdarlamalarda úzdik nátijelerge qol jetkizdim. Baiqaýda jeńimpaz atanǵanyma óte qýanyshtymyn, uiymdastyrýshylarǵa osyndai baiqaý ótkizgeni úshin jáne qoldaý kórsetken jandarǵa alǵys bildiremin. Mundai sharalar óz kásipterin damytý úshin óte qajet dep esepteimin», - deidi millionnyń iegeri Qasiet Oral.
Atap óteiik, qazirgi tańda oblysta múmkindigi shekteýli 29353 adam tirkelgen. Onyń ishinde I toptaǵy múgedekterdiń sany – 2827, II toptaǵy – 11145, III toptaǵy – 10526 bolsa, al 18 jasqa deiingi balalardyń sany – 4855-ti quraidy.
Olardy qoldaýǵa aimaqta júieli jumystar júrgizilýde. Aǵymdaǵy jyly jeke ońaltý baǵdarlamasyn iske asyrý úshin oblystyq biýdjetten 680 mln. teńge bólingen. 2018 jyldyń birinshi jartyjyldyǵynda jumyspen qamtý ortalyǵy arqyly 376 múmkindigi shekteýli adamdy jalpy jumys oryndarymen, onyń ishinde 148 múgedek jandy turaqty jumys oryndarymen qamtyp otyr. 2012 jyldan bastap óńirimizde «Invataksi» qyzmeti uiymdastyrylǵan. Bastapqyda invataksi tek 2 bolsa, búgingi kúni olardyń sany 18-ge jetti. Arbadaǵy azamattardy tasymaldaýǵa arnalǵan appareli bar arnaiy baspaldaqpen jabdyqtalǵan 112 avtobýs qyzmet kórsetýde. Sonymen qatar, memlekettik baǵdarlamalar aiasynda kásipkerlikpen ainalysýdy qalaǵan múmkindigi shekteýli qyzylordalyqtar ár salada óz isterin kedergisiz bastaý úshin jan-jaqty kómek ala alady.
Anyqtama: Oblys ákimdigi men oblystyq máslihat, «Nur Otan» partiiasynyń filialymen, qoǵamdyq keńes jáne kásipkerler palatasymen 2018-2020 jyldar oblysymyzda Jappai kásipkerlikti damytýdyń úsh jyldyǵy dep jariialandy. Bul kezeńde shaǵyn jáne orta kásipkerlikti damytýǵa basymdylyq beriletini sózsiz. Jappai kásipkerlikti damytý úsh mańyzdy máseleni: salyq bazasynyń ulǵaiýyn, jańa jumys oryndarynyń qurylýyn, qoǵamdyq-saiasi ahýal turaqtylyǵynyń jaqsarýyn qamtamasyz etetinin atap ótken jón.
Jumys istep turǵan kásipkerlerge, ásirese bolashaq kásipkerlerge barynsha qolaily jaǵdai jasaý maqsatynda Kásipkerler úii ashyldy. Bul ǵimaratqa Oblystyq kásipkerlik jáne týrizm basqarmasy, «Qyzylorda» aimaqtyq investitsiia ortalyǵy, Kásipkerlerge qyzmet kórsetý ortalyǵy, «Jobalardy saraptaý ortalyǵy» JShS, Óńirlik kásipkerler palatasy, AO «Tsesnabank» Qyzylorda oblysy filialy jáne taǵy da basqa mekemeler ornalasty.
