Qyzylorda oblysynda sońǵy bes kúnde koronavirýs infektsiiasyna bailanysty aýrý kórsetkishi edáýir ósti. Osyǵan bailanysty Qyzylorda oblysy sanitarlyq-epidemiologiialyq baqylaý departamentiniń basshysy Dinara Jańabergenova jergilikti turǵyndarǵa úndeý jariialady, dep habarlaidy "Ult aqparat".
Qyzylorda oblysynda sońǵy 5 kúnde aýrý kórsetkishi edáýir ósti. Kún saiynǵy virýs juqtyrý qarqyny artyp keledi. Ótken táýliktiń ózinde 27 jaǵdai tirkelgen. Bul - jyl basynan beri oryn alǵan bir kúndik eń joǵarǵy kórsetkish.
«Búgingi kúni oblys boiynsha koronavirýstyq infektsiia juqtyrǵandar sany 4071-ge jetti. Onyń 3% syrttan tasymaldanǵan bolsa, 56% skriningtik tekserý nátijesinde anyqtalǵan, 41% qarym-qatynas arqyly juqtyrǵan jaǵdailar.
Aýrý kórsetkishteriniń ósýi Naýryz merekesi kúnderinen keiin oryn alýda. Bul kúnderi karantin talaptaryna qaramastan merekelik korporativter, jasyryn toi-jiyndar jasap, shekteý sharalaryn buzýdyń saldary dep boljanady. Karantinge alynyp, úi-jaǵdaiynda oqshaýlanǵan adamdar men olarǵa kútim jasaityn adamdardyń da saqtyq sharalaryna salǵyrt qaraýy jaǵdaidy ýshyqtyrýda. Sebebi virýstyń adamǵa áser etý jyldamdyǵy joǵary. Onyń ústine virýstyń mýtatsiialanǵan jańa shtamdarynyń belsendiligi álem boiynsha artyp keledi», - dedi departament basshysy.
Onyń aitýynsha, qazir Qyzylorda oblysy «jasyl» aimaqta tur. Degenmen arqany keńge salyp, beiǵam otyrýǵa bolmaidy. Kerisinshe saqtyq sharalaryn álsiretpei, kúsheitý qajet ekendigin taǵy da eskertkim keledi. Oiyn-saýyq is-sharalaryn, kórmelerdi, forýmdardy, konferentsiialardy, sondai-aq otbasylyq saltanatty, estelik is-sharalaryn, onyń ishinde úide jáne adamdar kóp jinalatyn ózge de is-sharalardy ótkizýge tyiym salynǵan.
«Betperde kiiýge, jeke gigiena erejelerin, qoǵamdyq oryndarda araqashyqtyq saqtaýǵa, dene qyzýy kóterilip, jótel jáne tynys alý qiyndaǵan jaǵdaida meditsinalyq kómekke júginýge shaqyramyn. Ata-analarǵa kún saiyn balalarǵa saqtyq sharalarynyń mańyzdylyǵyn túsindirip otyrýdy suraimyn.
Tórtinshi toqsannan bastap bilim berý dástúrli formatqa kóshirildi. Mektep oqýshylary arasynda koronavirýs infektsiiasy taralýynyń aldyn alý maqsatynda shekteý sharalary, onyń ishinde karantin kezinde bilim berý uiymdaryna qoiylatyn sanitariialyq-epidemiologiialyq talaptar belgilendi. Bul talaptar árbir mektepte buljytpai oryndalýy tiis.
Árbir turǵyn mamandar keńesine qulaq asyp, karantin talaptaryn oryndasa infektsiianyń da taralýyntaratpaýǵa múmkindik bolady. Jaýapkershilik pen qaýipsizdik – ortaq», - dedi Dinara Jańabergenova.
Aita keteiik, Qyzylordada 5 myńnan astam adam koronavirýs infektsiiasyna qarsy vaktsina qabyldady.
