Qyzylorda oblysynda dástúrli tamyz keńesinde eń úzdik bilim berý uiymyna 34 mln teńge tabystaldy, dep habarlaidy "Ult aqparat".
Búgin oblys ákimi Gúlshara Ábdiqalyqovanyń qatysýymen «Bilimdi ult - turaqty damý kepili» taqyrybyndaǵy bilim berý qyzmetkerleriniń pedagogikalyq tamyz keńesi ótti. Aimaq pedagogtarynyń basqosýyna QR Parlamentiniń depýtattary Murat Baqtiiaruly, Aqmaral Álnazarova, Balaiym Kesebaeva, «Talap» KE AQ vitse-prezidenti Sanjar Tátibekov jáne ZOOM platformasy arqyly Y.Altynsarin atyndaǵy Ulttyq bilim akademiiasynyń prezidenti Ǵani Beisembaev qatysty. Sondai-aq, pandemiia jaǵdaiyn eskere otyryp, keńes jumysyna Qyzylorda qalasy jáne aýdan ákimderi, aimaqtaǵy bilim berý uiymdarynan 400-ge jýyq ókil ZOOM platformasy arqyly qosyldy.
«El táýelsizdiginiń 30 jyldyǵy qarsańynda ótkizilip otyrǵan dástúrli tamyz konferentsiiasynda bilim salasynyń keshendi damý josparyn aiqyndalyp, aldaǵy mindetter saralanady. Biyl Úkimet dástúrli formatta oqytý týraly sheshim qabyldandy. Ótken aptada jáne keshe qala, aýyldardy aralap, birneshe mekteptiń jańa oqý jylyna daiyndyq barysyn ózim kórip shyqtym. Oblys boiynsha bilim berý uiymdary 1 qyrkúiekte oqýshylardy qabyldaýǵa daiyn. Indettiń jańa shtamdary paida bolǵan qazirgidei qiyn kezeńde biz úshin árbir balanyń densaýlyǵy mańyzdy. Sondyqtan oblystyq bilim basqarmasyna barlyq bilim uiymdarynda sanitarlyq talaptardy qatań saqtaýdy, balalar ómiriniń qaýipsizdigin qamtamasyz etý máselesin erekshe baqylaýda ustaýdy tapsyramyn», - dedi oblys ákimi Gúlshara Ábdiqalyqova.
Elimizde pedagog jáne olarǵa teńestirilgen qyzmetkerlerdiń eńbekaqysy biyl 50%-ǵa kóterildi. Aldaǵy eki jylda eńbekaqy eki esege deiin ósedi. Osy jyly respýblikalyq biýdjetten bul maqsatqa 32,2 mlrd tenge qarjy bólindi. Ústimizdegi jyly bilim salasynyń biýdjeti 185 mlrd. teńgeni qurady, bul ótken jylmen salystyrǵanda 14 paiyzǵa artty. Sáikesinshe, jańa reformaǵa sáikes muǵalimderge qoiylatyn talap ta kúsheidi.
Jiynda Senat depýtaty Murat Baqtiiaruly men Májilisi tóraǵasynyń orynbasary Balaiym Kesebaeva bilim salasyndaǵy mańyzdy máselelerdi kóterdi. Atap aitsaq, bilim berý uiymdaryndaǵy bilim sapasynyń aiyrmashylyǵy, inkliýzivti bilim berý úshin arnaiy mektep ashý, muǵalimderdiń meditsinalyq anyqtamasyn ázirleýde jeńildikter qarastyrý sekildi usynystaryn jetkizdi.
Sonymen qatar aimaq pedagogtarynyń basqosýynda Y.Altynsarin atyndaǵy Ulttyq bilim akademiiasynyń prezidenti Ǵani Beisembaev «Bilim alýshylardyń bilimin tolyqtyrý jańa oqý jylynyń basty mindeti», «Talap» Kommertsiialyq emes aktsionerlik qoǵamynyń vitse-prezidenti Sanjar Tátibekov «Tehnikalyq jáne kásiptik bilim berýdi transformatsiialaýdyń ózekti baǵyttary» taqyryptarynda baiandama jasady.
Oblystyq bilim basqarmasynyń basshysy Aqzira Qasymova atqarylǵan jumystar men aldaǵy mindetter týraly baiandady.
«Byltyrǵy jyly onlain oqytý mektepterdiń kompiýterlik parkin jańartýǵa da septigin tigizdi. Osylaisha kompiýterler parkin tolyqtai jańartý arqyly bir oqýshy sanyna shaqqandaǵy kompiýterler kórsetkishi 14-ten 5-ke deiin tómendedi. Bilim salasynyń bastapqy satysy - mektepke deiingi tárbie baǵytynda da nátijeli qadamdar bar. Oblysta 670 mektepke deiingi uiymdarda 58 myńnan astam bala tárbielenýde. Biylǵy jylǵy maqsat - tirek bilim berý uiymdary arqyly tájiribeni ár aýdannan IT balabaqsha jelisin ashatyn bolamyz», - dedi Aqzira Qasymova.
Jańa oqý jylynda 294 memlekettik jáne 10 jeke mektepte 177 myń oqýshy bilim alady. Onyń ishinde 1-synypqa 18 myńnan asa bala qabyldanady.
Dástúrli formatta oqýdy bastaityn mektep oqýshylary men muǵalimderdiń qaýipsizdigi úshin barlyq bilim berý uiymdary «Ashyq» qosymshasyna qosyldy. Pedagogtardyń 97% vaktsinatsiialandy. Oqý jylynyń bastalýyna deiin bul kórsetkish 100% jetedi dep josparlanýda.
Aimaq mektepteri beinebaqylaý júiesimen tolyqtai qamtyldy. Ótken jyly 70 mektep jedel basqarý ortalyǵyna qosylsa, biyl 35 mektep ulttyq beinemonitoring júiesiniń tikelei baqylaýyna engen.
Aldaǵy 5 jylda óńirde 28 mektep qurylysy bastalyp, biyl 6 jańa mektep paidalanýǵa beriledi. Biyl Aral aýdany, Sekseýil kentindegi 300 oryndyq mektep pen investorlar esebinen júrgizilgen 2 jeke mektep qurylysy da oqý bastalǵansha bitedi. Qalǵan 3 mektepti jyl sońyna deiin tabystalady.
Saltanatty sharada bilim berý isine eleýli úles qosyp, otandyq bilim men ǵylym salasyna erekshe eńbek sińirgen úzdikter marapattaldy.
Oblys ákiminiń «Úzdik orta bilim uiymy» grantymen oblystyq konkýrs jeńimpazy – Qyzylorda qalasy, Tákei Esetov atyndaǵy №264 mektep-litseii marapattaldy. Syiaqy mólsheri - 34 mln teńge.
