Qyzylorda-Shymkent aqyly tasjoly aptapqa shydamai, búlindi, - dep habarlaidy Tengrinews.kz agenttigi.
Oqiǵa Túrkistan oblysynda 8 maýsymda kúndiz bolǵan. Júrgizýshiler Tórtkól aýyly aýmaǵynda joldyń asfalt-beton jabyndysy kóterilip ketkenin baiqaǵan. Kólikter búlingen joldy ainalyp, jol shetine shyǵýǵa májbúr.
"QazAvtoJol" málimetinshe, oqiǵa respýblikalyq Samara-Shymkent tasjolynyń bir bóligi Qyzylorda-Shymkent aqyly tasjolynda bolǵan. Sol kúni oblysta aýa temperatýrasy joǵary bolǵany aityldy. Termometr baǵany 45 gradýsqa deiin kóterilgen.
"Saǵat 17.00 shamasynda tasjoldyń oń jaǵynda aýa temperatýrasynyń joǵarylaýyna bailanysty tsement-beton taqta kóterildi. Qazirgi ýaqytta taqtany bólshekteý jumystary júrgizildi. Ýaqytsha qalpyna keltirý jumystaryn merdiger "ShymkentDorStroi" júrgizdi. Qiyrshyq-qum qospasy quiylyp, asfalt-beton jabyny tóseldi. 10 adam jáne bes tehnika jumyldyryldy", - dedi ulttyq kompaniia ókilderi.
Sondai-aq, oqiǵa aimaǵynda eskertý belgileri ornatylǵan. Jolǵa Túrkistan oblysynyń patrýldik kólikteri qoiylǵan.
