Bilim kúnine orai Qyzylorda oblysynyń Jańaqorǵan aýdanynda 2 jańa mektep paidalanýǵa berildi.
Jańaqorǵan aýdany, Túgisken aýylynda 300 oryndyq №256 mekteptiń ashylý saltanaty ótti.
Oblys ákiminiń orynbasary Rýslan Rústemov sharaǵa qatysyp, aimaqta áleýmettik salanyń damýyna basa nazar aýdarylatynyn atap ótti.
«Biylǵy jyl Túgisken aýylynyń turǵyndary úshin jaǵymdy jańalyqtarǵa toly boldy. Mamyr aiynda aýylda 140 balaǵa arnalǵan balabaqsha jáne sporttyq-saýyqtyrý kesheni paidalanýǵa berilgen edi, búgin jańa mektepti ashaiyn dep otyrmyz. Jalpy, aimaqta áleýmettik salaǵa basymdyq berilip otyr, birneshe jyldan beri oblystyq biýdjettiń aýqymdy bóligi áleýmettik jobalardy qarjylandyrýǵa jumsalýda », - dedi oblys ákiminiń orynbasary.
Osyndai 300 oryndyq mektep Jańaqorǵan kentinde de iske qosyldy. Atap óteiik, Jańaqorǵan aýdanynda biyl 4 bilim oshaǵy paidalanýǵa beriletin bolady. Buǵan deiin Jańaqorǵan aýdanynyń Qojamberdi aýylynda 200 oryndyq №162 mektep ashylǵan bolatyn. Sonymen qatar, jyl sońyna deiin Aqqum aýylyndaǵy 100 oryndyq bilim uiasynyń da qurylysy aiaqtalady.
Aita keteiik, 30 tamyz kúni Qazaly aýdanynyń ortalyǵynda, Áiteke bi kentinde 300 oryndyq mektep paidalanýǵa berildi.
Qyzylorda oblysynda sońǵy 5 jyldyń ishinde 45 bilim oshaǵy, onyń ishinde 37-si apattyq mekteptiń ornyna salynǵan. Jyl sońyna deiin Aral qalasynda 300 oryndyq jáne Qyzylorda qalasynda 600 oryndyq mektep ashylady.
