Foto: gov.kz
Konstitýtsiia kúni qarsańynda Qyzylorda qalasynda Memleket basshysynyń bastamasymen júzege asyrylyp jatqan «Keleshek mektepteri»ulttyq jobasy aiasynda eki jańa mektep paidalanýǵa berildi. Mektepterdiń ashylý saltanatyna Oqý-aǵartý ministri Ǵani Beisembaev, oblys ákimi Nurlybek Nálibaev, qoǵam ókilderi, pedagogter men qala turǵyndary qatysty.
Qalanyń halyq eń tyǵyz qonystanǵan aýdandarynyń biri «Arai» shaǵyn aýdanynda 1500 oryndyq jańa mektep esigin aiqara ashty. Bul – Qyzylordadaǵy eń iri bilim oshaǵy. Ol synyptardaǵy artyq júktemeni azaityp, balalarǵa jaily ortada bilim alýǵa múmkindik beredi. Sondai-aq «Qyzyljarma» shaǵyn aýdanynda 900 oryndyq jańa mektep paidalanýǵa berildi. Ol eski ǵimarattyń ornyna salynǵan ári zamanaýi standarttarǵa sai keledi.
Oblys ákimi atap ótkendei, Qyzylorda úsh aýysymdy oqytý máselesin túbegeili sheshken kóshbasshy aimaqtardyń qataryna endi. Buǵan deiin mundai nátijege Shymkent qalasy men Aqmola oblysy qol jetkizgen bolatyn.
Óńir turǵyndary aldynda sóz sóilegen oqý-aǵartý ministri sońǵy eki jylda júieli jańǵyrtý men mektep infraqurylymyn keńeitý nátijesinde elimizde úsh aýysymdy mektepterdiń sany úsh esege qysqarǵanyn erekshe atap ótti.
«Eki jyldyń ishinde Qazaqstandaǵy úsh aýysymdy mektepterdiń sany úsh ese azaidy. Búginde shamamen 3 myń mektep bir aýysymda, 5 myńǵa jýyq mektep eki aýysymda jumys isteidi. Mundai nátijege memleket tarapynan jańa mektepter qurylysy men infraqurylymdy jańǵyrtýǵa baǵyttalǵan aýqymdy sharalardyń arqasynda qol jetkizilip otyr. 2025–2026 oqý jyldary 267 myń orynǵa arnalǵan 232 jańa mekteptiń qurylysy josparlanǵan. Sonymen birge mektepterdi jańǵyrtý boiynsha renovatsiiadan ótkizý baǵdarlamasy júzege asyrylýda. Biyl bul baǵdarlama 190 myń oqýshy bilim alatyn 245 mektepti qamtidy», – dedi Ǵani Beisembaev.
Jańa mektepter – balalardyń bilim alýy men damýyna arnalǵan innovatsiialyq keńistik. Olar zamanaýi STEM-zerthanalarymen, robototehnika kabinetterimen, horeografiia jáne birneshe sport zalymen jáne meditsinalyq pýnkttermen jabdyqtalǵan. Ásirese, inkliýzivti bilim berý men balalardyń qaýipsizdigine erekshe nazar aýdarylǵan.
Búginde Qyzylorda oblysynda segiz jaily mektep bar. Onyń ekeýi osy aptada ashylsa, taǵy ekeýi jańa oqý jyly bastalǵanǵa deiin oqýshylardy qabyldaýǵa daiyn. Jalpy, «Keleshek mektepteri» ulttyq jobasy aiasynda elimizde 460 myń oqýshyǵa arnalǵan 217 bilim berý uiymyn salý josparlanǵan.
