Qyzylorda oblysynyń Aral aýdanynda 1942 jyly maidanǵa attanǵan jáne bir jyldan keiin shaiqastardyń birinde habarsyz ketken Ekinshi dúniejúzilik soǵysyna qatysýshy Kelis Jienbaevtyń súiekterin qaita jerleý rásimi ótti. Bul týraly "Ult aqparat" QR Qorǵanys ministrliginiń baspasóz yqzmetine silteme jasap habarlaidy.
Sarbazdyń súiekteri Qazaqstan Áskeri-áýe kúshteriniń áskeri bortymen jetkizildi. Týystaryna jetkizilgennen keiin barlyq áskeri rásimdi saqtai
otyryp, sarbazdyń súiekteri jer qoinyna tapsyryldy.
Ótken jyly «Eske alý vahtasy» aktsiiasy aiasynda Resei Federatsiiasy, Tver oblysy, Zýbtsovsk aýdanynyń mańynda júrgizilgen izdestirý operatsiiasy barysynda soǵysta qaza tapqan áskeri qyzmetshiniń súiegi tabyldy. Sarbazdyń moiyntumaryn saraptaýdan ótkizý kezinde onyń jeke derekteri anyqtaldy. Qaza bolǵan sarbaz Qyzylorda
oblysy Aral aýdanynan Qyzyl ásker qataryna shaqyrylǵan Kelis Jienbaev ekendigi belgili boldy.
Qazaqstandyq sarbazdyń súiekterin týystaryna tapsyrý jáne qaita jerleý boiynsha odan ári daiyndyq jumystary Resei Federatsiiasyndaǵy Qazaqstan Respýblikasy Elshiligi janyndaǵy Áskeri attashe apparaty jáne QR Qorǵanys ministrligi qurylymdyq bólimshelerimen birlese júzege asyryldy.
Sarbazdyń týystaryn izdestirý kezinde Máskeý qalalyq izdeý ortalyǵynyń kórsetken kómegi zor.
«Anam árdaiym ákesiniń súiekteri tabylyp, týǵan jerinde jerlengenin armandaityn, ókinishke orai, bir jyl buryn osy kúndi kórmesten dúnieden ozdy. Al búgin marqum anamnyń armany oryndaldy. Biz bul úshin óte qýanyshtymyz jáne rizamyz». Qaza tapqan sarbazdyń nemeresi Muhtar Qazbekov áskeri qyzmetshiler men izdestirý tobyna osylaisha alǵysyn bildirdi.
