Jyl basynan beri politseiler qyzmettik itterdiń kómegimen 4 myńnan astam qylmysty ashty. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat.
«Aýyr qylmystardyń, urlyq pen esirtkige bailanysty quqyqbuzýshylyqtardyń ashylýyn tájiribeli kinologtar men olardyń arnaiy úiretilgen itterinsiz elestetý qiyn», - dedi Nurdildá Oraz Ishki ister ministrligi uiymdastyratyn aptalyq brifingide.
Onyń aitýynsha, qyzmettik itterdiń kómegimen jyl basynan beri 4261 quqyqbuzýshylyq pen qylmys ashylǵan, onyń ishinde 1872 urlyq, 652 esirtki ainalymy, 143 tonaý, 25 qaraqshylyq jáne 46 kisi óltirý faktileri bar.
«Tóbetter, spanielder, labradorlar – jyl basynan beri zańsyz ainalymnan bir tonnadan astam túrli esirtki zattaryn alýǵa kómektesti. Qyzmettik itter jarylǵysh zattardy izdeýde jáne ártúrli is-sharalardy ótkizý úshin óte qajet. Osy jyly politseilerdiń tórt aiaqty kómekshileri 4,5 myńnan astam tapsyrmaǵa shyqqan», - dedi Nurdildá Oraz.
