Sybailas jemqorlyqqa qarsy is-qimyl agenttiginiń 1-shi departamentiniń asa mańyzdy ister jónindegi tergeýshisi Daniiar Bekaidarov baǵynyshty qyzmetkerdiń jemqorlyǵy úshin basshylaryn ostavkaǵa jiberý institýty qalai jumys istep jatqany týraly aityp berdi, dep habarlaidy "Ult aqparat".
«Tikelei baǵynyshtylardyń jemqorlyǵy úshin basshylardyń jaýapkershiligi institýty normativtik turǵyda retteldi. Ol biylǵy jyldyń 9 aiynda ózinde tiimdi qural ekenin dáleldedi. Saiasi basshylardyń otstavkaǵa ketýine qatysty qarastyrylyp otyrǵan kezeńde aýdandyq jáne oblystyq deńgeidegi 9 ákim otstavkaǵa ketý týraly ótinish berdi, 6 ákim jumystan shyǵaryldy», - dedi ol onlain brifing barysynda.
Máselen Sátbaev qalasynyń ákimi Ydyrysovtyń jáne Almaty oblysy Panfilov aýdany ákimi Ómirálievtiń otstavkalary qabyldanbaǵan. Oblys ákimderi olarǵa «sógis» jariialapty. Qaramaǵyndaǵy qyzmetkerleri jemqorlyq qylmysty ózgeristi engizýge deiin (2019 jylǵy 10 jeltoqsan) jasaǵandyqtan, Sátbaev qalasynyń ákimi otstavkaǵa ótinish bermeýine de bolar edi.
«28 qyrkúiekte Qostanai oblysy Rýdnyi qalasynyń ákimi Ǵaiazov otstavkaǵa ketti. Ol bul qyzmetti 2011 jyldan beri atqaryp keledi. Buǵan deiin habarlanǵandai (13 qyrkúiek) oǵan tikelei baǵynyshty Rýdnyi qalasy Qashar kentiniń ákimi Aldonǵarovqa qatysty úkim zańdy kúshine engen bolatyn. Sol sekildi Atyraý oblysy Qurmanǵazy aýdanynyń ákimi Nurtaevtyń otstavkaǵa ketý týraly ótinishi qaralýda. Onyń orynbasary Tájibaev sottaldy. 8 qyrkúiekte onyń orynbasary Tájibaevqa qatysty úkim zańdy kúshine endi. 5 is áli monitoringte», - dedi Daniiar Bekaidarov.
