QR Ishki ister organdarynyń qurylǵanyna 30 jyl tolýyna orai ótken merekelik kontsertte elorda ákimi Altai Kólginov qyzmet babynda qaza tapqan politseidiń otbasyna páter kiltin tabystady, dep habarlaidy QazAqparat Nur-Sultan qalasy PD baspasóz qyzmetine silteme jasap.
Atap aitqanda, páter kilti Nur-Sultan qalasy PD Mamandandyrylǵan patrýldik politsiia batalonynyń aǵa inspektory Baýyrjan Sambetovtyń jubaiy Fariza Sambetovaǵa berildi. Marqumnyń artynda bes balasy qalǵan.
«Biz qaza bolǵan qyzmetkerlerimizdiń qaisarlyǵy men erligine zor qurmetpen qaraimyz. Erik-jigeri men rýhynyń jeńilmeitindigin kórsetip, antyna sońyna deiin adal bolyp, ózgelerdi qutqarý jolynda janyn pida etip, paryzyn abyroimen atqardy. Jalpy, táýelsizdik jyldarynda elordalyq departamenttiń 27 ofitseri qyzmet babynda jáne qyzmettik mindetterin atqarý kezinde qaza tapty», - dedi Nur-Sultan qalasy Politsiia departamentiniń bastyǵy, general-maior Marat Tólebaev.
Sondai-aq, qyzmettik mindetterin adal atqarǵany, jumysta joǵary nátijelerge qol jetkizgeni úshin IIM Ministriniń buiryǵymen jáne Nur-Sultan qalasy PD bastyǵynyń buiryǵymen elordalyq politsiia qyzmetkerlerine basshy quramnyń arnaýly ataqtary merziminen buryn berildi jáne medaldar, gramotalar men alǵys hattar tabystaldy.
Bir satyǵa biik basshy quramnyń «politsiia polkovnigi» arnaýly ataǵy Nur-Sultan qalasy PD Jergilikti politsiia qyzmeti basqarmasynyń aǵa inspektory, politsiia podpolkovnigi Botagóz Ahmanovaǵa berildi.
Qazaqstan Respýblikasy IIM Qurmet gramotasymen Nur-Sultan qalasy PD aidaýyldaý qyzmeti vzvodynyń politseii, politsiia aǵa serjanty Lazzat Júsipova marapattaldy.
IIM gramotasymen Nur-Sultan qalasy PD Esil aýdany PB tyldyq qamtamasyz etý bólimshesiniń politsei-júrgizýshisi, politsiia starshinasy Muratbek Orynbaev, Nur-Sultan qalasy PD Kinologiialyq qyzmet ortalyǵynyń inspektor-kinologi, politsiia aǵa leitenanty Damir Jumajanov marapattaldy.
«Memleket basshysy quqyq qorǵaý júiesin dáiekti túrde transformatsiialaý belgilengen qaita qurýlardyń negizgi baǵyty bolyp tabylatynyn atap ótti. Ol úshin kadr áleýetin turaqty jetildirýdi, kásibilikti arttyrýdy jáne qyzmetkerlerdiń moraldyq rýhyn nyǵaitýdy qamtamasyz etý qajet. Prezidenttiń tapsyrmasy boiynsha osy jyldyń maýsym aiynan bastap jergilikti politsiia qyzmetkerleriniń jalaqysyn 30%-ǵa kóterdik. 140 patrýldik avtokólik, 1 600 elektrondy tehnika satyp aldyq, Baiqońyr jáne Saryarqa aýdandaryna jeke ǵimarattar usyndyq, Esil aýdanynyń politsiiasy men PD bólinisteri úshin ǵimarattar saldyq. Biyl politsiia departamentine taǵy 54 patrýldik avtokólik satyp alyp berýdi josparlap otyrmyz», - dedi Altai Kólginov saltanatty shara barysynda.
