Qytaidan importtyń kórshi elderge aitarlyqtai óskeni baiqalady. Bul týraly Eýraziialyq úkimetaralyq keńestiń keńeitilgen otyrysynda QR Premer-Ministri Álihan Smaiylov aitty, dep habarlaidy QazAqparat.
«Biz syrtqy jáne ózara saýda-sattyq statistikalaryn teńestirý ári syrtqy saýda aǵyndarynyń ashyqtyǵy qajet ekendigi jaiynda jii aitamyz. Sur import ishki óndirýshilerge, zańdy importtaýshylarǵa aitarlyqtai ziianyn tigizedi, memleketterimizdiń biýdjetine teris áser etedi. Qazirgi ýaqytta Qazaqstan Qytaimen shekaradaǵy kedendik baqylaý is-sharalaryn aitarlyqtai kúsheitti. Eki aiǵa tolmaityn ýaqyttyń ishinde qabyldanǵan is-sharalar taýarlardyń rásimdelýiniń jáne kedendik tólemderdiń artýyna alyp keldi. Degenmen, Qytaidan importtyń kórshi elderge aitarlyqtai óskenin baiqap otyrmyz», - dedi Álihan Smaiylov.
Úkimet basshysynyń atap ótýinshe, odan keiin atalǵan import laiyqty kedendik tazartýsyz jáne salyq tólemderin tólemesten EAEO-nyń ortaq naryǵyna túsedi.
«Bul rette «jalǵyz kisi jaý almas» degen maqal oryn alǵan jaǵdaidy sipattaýǵa dál keledi. Syrtqy saýda-sattyqty, birinshi kezekte Qytaimen saýdany tolyqqandy ári sapaly kedendik rásimdeýge birlese kúsh salýymyz qajet. Barlyq protsesterdi jáne málimetter almasýdy dereý tsifrlandyrý kerek. Bul adal básekelestikti damytý jáne salyqtar men kedendik baj salyǵy esebinen biýdjetke túsimderdi arttyrý úshin serpin beredi. Mundai jumysty komissiianyń belsendi úilestirýimen júrgizý qajet. Kelissózder alańyn qurǵannan is bitpeidi. Naqty qadamdar qabyldaityn jáne kóptegen saǵatqa sozylatyn jinalystardan bas tartatyn ýaqyt keldi», - dedi Qazaqstan Premer-Ministri.
