Qytailyq jankúier qyzdar Dimash Qudaibergenge Qazaqstannan taǵam tasyp jatyr, - dep habarlaidy kaz.tengrinews.kz ánshiniń PR-direktory ári dosy Alpamys Sharimovqa silteme jasap.
"Dimashtyń @kudaibergenov.dimash jankúierleri kúnnen-kúnge tańǵaldyrýlaryn qoimaidy. Rasymen, maqtanǵa salynbaiyqshy dep, kóp tosyn syilardy jariialai bermeimiz. Biraq, búgingisi erekshe! Qytai fanattary arnaiy Qazaqstandy zerttep, viza ashyp, elimizge barypty. Dimashtyń qarny ashyp qalmasyn dep, qazaq ulttyq taǵamdaryn daiyndap búgingi túski asta bizdi tańqaldyrdy. Qazy-qarta, tary-talqan, qurt-mai, jemis-jidek bári bar! Jyraqta júrgen jan úshin bul taǵamdardyń orny erekshe ekeni sózsiz! Qorap-qorap syilyq. Áli ashyp ta úlgermei jatyrmyz! Barlyǵy ánshisine degen nieti ǵoi jankúierlerdiń", - deidi ánshiniń ókili.
Qorap-qorap bolyp jasalǵan syilyqtyń ishinde súrilgen et, qazy-qarta, qurt, tary bar.
Onyń aitýynsha, Dimash Qudaibergenge arnalǵan fan-toptar kóp. "Bul #DimashSisters iaǵni "Dimashtyń qaryndastary" atty fan toptyń syilyǵy. Qiialdarynda shek joq qoi shirkin!? Qandai keremet!.. Dimashtyń atynan barsha #DimashSister fan tobynyń qyzdaryna alǵys bildiremin! Búgin biz rasymen de aýylǵa baryp qaitqandai boldyq!!! Raqmet, Dears!", - dep jazdy ol Instagram jelisinde.
Aita keteiik, Dimash Qudaibergen aldaǵy senbide, iaǵni 11 naýryzda Hunan TV arnasynda Dimash Qudaibergen I'm a Singer baiqaýynyń segizinshi kezeńinde óner kórsetedi. Al 9-shy týrda qazaqstandyq ánshi All by Myself ánin oryndaidy.
