Lager 160 adamǵa arnalǵan. Olar úshin birneshe avtonomdy modýlderden turatyn "Qoný aimaǵy" jáne baza salynǵan.
Qytaidyń soltústik-batysyndaǵy lagerde Mars planetasyndaǵy tárizdi orta jasalǵan. Bazaǵa ǵalymdar men qarapaiym týrister kele alady, dep habarlady South China Morning Post.
Lager 32 ga aýmaqty alyp jatyr. Ol Lenhý qalasynan 60 shaqyrym jerdegi qurǵaq shóldi aimaqta ornalasqan.
Qytai aeroǵaryshtyq ǵylymi-tehnikalyq korporatsiiasynyń direktory Pan Gohýeidiń aitýynsha, bul jerdiń aýmaǵy Marsqa uqsas.
Baza eki bólikke bólingen, olardyń birinde "Marsqa Qoný" aimaǵy bolsa, al ekinshisinde – "Marsiandyq lager" ornalasqan, ol 160 adamdy ornalastyra alatyn birneshe modýlden quralǵan.
"Bul lager Marsqa baratyn adamdardyń bolashaq ómir súrý ortasyna barynsha jaqyndatylyp jasalǵan", – dedi lager basshysy Gao Tsziýnlin.
Jobanyń qurylysy 2018 jyldyń maýsym aiynda bastaldy, oǵan barlyǵy 150 mln iýan (22,3 mln dollar) jumsalǵan.
Basylym sondai-aq, Qytai ǵaryshty igerý baǵdarlamasyn keńeitip, kelesi jyly Qyzyl planetaǵa roverdi jiberýdi josparlap otyrǵany týraly da jazdy.
Onyń egjei-tegjeiin Qytaidyń Aidy barlaý baǵdarlamasynyń bas injeneri Vý Vei Ren aityp bergen.
Qytai ushyrmaq bolyp otyrǵan zond Mars orbitasyna shyǵyp, keiin Qyzyl ǵalamsharǵa qonady. Qytailyqtar osy zond Mars betin tolyqqandy zertteidi dep úmittenip otyr.
Vý Vei Renniń aitýynsha, Qytai «Change 5» baǵdarlamasyn qaita qolǵa alyp, biyl jeltoqsanǵa deiin zondty Aiǵa ushyrmaq. Eger ol Ai betinen alynǵan úlgilerdi jinap, Jerge sátti oralsa, Qytai AQSh jáne burynǵy Keńes Odaǵynan keiingi osy tehnologiiany igergen úshinshi el atanady.
