QR Ulttyq bank tóraǵasy Erbolat Dosaev búgin Almatyda ótken baspasóz máslihaty barysynda Qytai ekonomikasy álemdik ekonomikaǵa qanshalyqty yqpaly etetindigin aitty, dep habarlaidy QazAqparat.
«Biyl Úkimet, Ulttyq bank jáne jańa agenttik arasynda jumysty úilestirý boiynsha kelisim jasalady. Kóktemde Memleket basshysynyń eskertýlerin eskere otyryp, mejelengen maqsatqa jetý úshin barlyq shara qoldanylatyn bolady. Basty syn-qaterler jaily jyldyń basynda aitylǵan bolatyn. Qazaqstan ekonomikasynyń qurylymy áli de shikizat saýdasy bolyp tur. Baǵalardyń turaqsyzdyǵy osydan shyǵyp jatyr. Endi, biylǵy basty syn-qater Qytai ekonomikasynyń ahýalynan bolmaq», - dedi E.Dosaev.
Ulttyq bank basshysynyń aitýynsha, Qazaqstannyń Eýroodaq, Resei, Qytai siiaqty 3 iri seriktesi bar. Olar Qazaqstan taýary, shikizaty satylatyn negizgi naryqtar bolyp tabylady.
«Qytai ekonomikasynyń ahýaly Qazaqstan úshin ǵana emes, barlyq álemge mańyzdy. Naryqtaǵy qaýesetter árdaiym qandai da bir ózgeris engizip otyrady. Aziia birjalary ashylǵannan keiin 8 paiyzǵa quldyrap ketti. Meniń oiymsha, kórshimizdiń jai-kúiin muqiiat baqylaýǵa alý kerek. Soǵan sáikes aqsha nesie boiynsha is áreket jasaý qajet», - dedi ol.
