Qyrǵyzstan parlamenti densaýlyq saqtaý jáne áleýmettik damý ministri Alymkadyr Beishenalievti qyzmetinen bosatý týraly usynys jasaǵan áleýmettik máseleler, bilim, ǵylym, mádeniet jáne densaýlyq jónindegi komitettiń úndeýin qoldady. Mundai sheshimniń qabyldanýyna ministrdiń jaqynda koronavirýsty Ystyqkól tamyrymen (ýqorǵasyn) emdeý týraly málimdemesi túrtki bolǵan, dep habarlaidy Azattyq.
Depýtattar sonymen birge ministrdiń komitet pen Jogorký keńesh otyrystaryna shaqyrylǵanyna qaramastan kelmegeni narazy boldy.
Parlament ókilderiniń aitýynsha, ministrdiń ýqorǵasyn jaily málimdemesi Qyrǵyzstannyń bedeline nuqsan keltirgen. Sáikesinshe, Beishenalievtiń bul qyzmetke laiyqty ekenine kúmán týyndaǵan.
16 sáýirde Alymkadyr Beishenaliev dárigerler naýqastardy ýqorǵasynmen emdep jatyr dep málimdep, jýrnalisterdiń aldynda ýly ósimdiktiń tunbasyn ishken. Ol mundai usynysty prezident Sadyr Japarov jasaǵanyn jáne tunbany ázirleýge de qatysqanyn aitqan.
Birqatar sarapshylar men dárigerler sheneýnikke Ystyqkól tamyry nemese ýqorǵasynnyń óte ýly ósimdik ekenin, tipti ony dene syrtyna qoldaný qaýipti ekenin eskertken. Dúniejúzilik densaýlyq saqtaý uiymy klinikalyq synaqtan ótpegen preparattyń tirkelýi múmkin emes ekenin jáne paidalanýǵa usynylmaitynyn aitqan.
Buǵan deiin Facebook jelisi "áleýmettik jeli erejesin buzǵany úshin" Sadyr Japarovtyń ýqorǵasyn jaily jazbasyn óshirgen. Prezidenttiń Instagram-daǵy jazbasy da joiylǵan.
