Qyrǵyzstannyń memlekettik ulttyq qaýipsizdik komiteti tóraǵasynyń orynbasary Mirlan Týrgýnbaev 16 qazanda Siriiadaǵy lagerler men túrmelerde shamamen 500 qyrǵyz azamaty otyrǵanyn aitty. Parlament depýtattarynyń suraqtaryna jaýap bergen komitet ókili Siriiadan áielder men balalardy eline qaitarý boiynsha kelissózder jalǵasyp jatqanyn jetkizdi.
"Siriiadaǵy áielder men balalardyń aty-jónderin anyqtap jatyrmyz. Bosqyndar lagerinde jáne túrmelerde 500-den astam qyrǵyz azamaty bar. Olardy eline qaitarý boiynsha kelissóz júrip jatyr" dedi Týrgýnbaev.
Buǵan deiin Qyrǵyzstan biligi Siriiadaǵy qyrǵyz azamattarymen kezdesý úshin halyqaralyq uiymdar men Túrkiiadaǵy Qyrǵyzstan elshiliginiń kómegine júgingen. Úkimette vitse-premer Jenish Razakovtiń jetekshilik etýimen qyrǵyzdardy eline qaitarý boiynsha jumys toby qurylǵan. Razakov Irakta qaqtyǵys aimaqtarynda ata-anasyz 78 qyrǵyz bala qalǵanyn aitqan. Olardyń analary qamaýda otyr.
Resmi derek boiynsha, 2013-2014 jyldary Siriia men Iraktaǵy qaqtyǵys oshaqtaryna shamamen 800 qyrǵyz azamaty ketken. Olardyń 150-i - áiel. Shamamen 200 azamat soǵysta qaza tapqan.
Buǵan deiin Qazaqstan, Tájikstan, Grýziia, Qyrǵyzstan, Ózbekstan Irak pen Siriiaǵa soǵysqa ketken azamattaryn qaqtyǵys oshaqtarynan evakýatsiialaǵan. 2019 jyly Qazaqstan biligi "Jýsan" operatsiiasy barysynda Siriiadan 516 adamdy jetkizgen, olardyń 360-y - bala. Siriiadan oralǵandardyń keibiriniń ústinen qylmystyq is qozǵalyp, sottaldy.
Ótken apta sońynda Ózbekstan biligi 64 balany Iraktan eline jetkizgenin habarlady.
