28 sáýir kúni Qyrǵyzstan men Tájikstan shekarasynda eki el turǵyndary ózara kelispei, qaqtyǵys bastaldy. Qyrǵyzstannyń 3 aýylynda tótenshe jaǵdai rejimi engizildi, dep habarlaidy "Ult aqparat".
Qyrǵyzstannyń «Hovar» agenttiginiń habarlaýynsha, shekaradaǵy kelispeýshilik áli jalǵasýda. Búgin tańǵy saǵat 05:45-te áskeri bólimge qarai Tájikstan azamattary oq atqan. Al Osh-Isfana kúre jolyndaǵy kólikterge tájiktiń Maiskii aýylynan turǵyndar tas laqtyrýda. Atalǵan fakti QR Qylmystyq kodeksiniń 266-baby (buzaqylyq) boiynsha tirkeldi.
Budan bólek, Qyrǵyzstannyń Kók-Tash aýylynyń 30 jastaǵy turǵyny kózine oq jaraqatyn alǵan. Ol aýrýhanaǵa jetkizildi. Bul oqiǵa «Adam óltirýge oqtalý» baby boiynsha tirkeldi.
Quqyq qorǵaýshylar janjal ornynda kúsheitilgen qyzmet atqarýda.
Qyrǵyzstan Batken aýdanynyń úsh aýylynda tótenshe jaǵdai rejimin engizdi.
«Kabar» aqparatyna súiensek, búgin Qyrǵyzstannyń Batken oblysynyń basshysy Ómirbek Sývanaliev pen Tájikstannyń Sogdiiskaia oblysynyń basshysy Radjabb Ahmadzoda shekaradaǵy jaǵdai boiynsha kelissózdi bastady
Al Tájikstannyń «Hovar» agenttiginiń habarlaýynsha, 28 sáýir kúni saǵat 16:00-de Isfara qalasy mańyndaǵy Hodjai Alo aýyly qasynda ornalasqan «Golovnoi» sý taratýshy pýnkte Tájikstan men Qyrǵyzstan shekarasyndaǵy aýyl turǵyndary kelispei qalǵan.
Eki jaq bir-birine tas laqtyrǵan. Saldarynan Tájikstannyń 7 azamaty túrli dárejedegi dene jaraqatyn aldy.
«1924-1927 jáne 1989 jyldarǵy kartalarǵa sáikes, bul gidroobekti Tájikstan Respýblikasynyń aýmaǵynda ornalasqan. Ol 1968 jyly salynǵan jáne Tájikstan, Qyrǵyzstan men Ózekbstan Respýblikalarynyń shekara mańyndaǵy qalalary men aýdandarynda irrigatsiialyq jumystardy júrgizýge, aýylsharýashylyq jerlerdi sýarýǵa arnalǵan», - delingen Tájikstan Respýblikasy Memlekettik ulttyq qaýipsizdik komitetiniń aqparatynda.
Vedomstvo «sý taratýshy nysan Qyrǵyzstan Respýblikasynyń eldi mekenderinen alys ornalasqanyn, alaida qyrǵyz tarapy óz azamattaryn ultaralyq shieleniske ádeii itermelep otyrǵanyn» atap ótýde.
