QR Ishki ister ministrligi Ákimshilik politsiia komiteti tóraǵasynyń orynbasary Serik Túsipov sheteldik nómiri bar kólik ieleriniń jol erejesin buzý kórsetkishteri týraly jańa málimetterdi aitty, dep habarlaidy QazAqparat.
«Júrgizýshilerdiń tártibin arttyrýda ereje buzý oqiǵalaryn avtomatty túrkeý júiesi eleýli ról atqaryp otyr. Búgingi tańda jol júrý erejesin buzǵan jaittardyń 40 paiyzǵa jýyǵy osy júieniń kómegimen anyqtalady. Joldarda 13 myńnan astam osyndai kamera ornatylǵan. Olar jyldamdyq rejimin arttyrý, «stop-syzyq» pen «tutas jolaqty» kesip ótý, tyiym salynǵan belgige ótý, qoǵamdyq kóliktiń jolaǵyna túsý siiaqty zańsyzdyqtardy avtomatty túrde tirkeidi», - dedi ol vedomstvonyń aqparat alańynda ótken onlain brifingide.
Onyń málimeti boiynsha, sheteldik nómiri bar kólikpen júrgenderdiń jáne ereje buzǵandardyń jeke basyn jedel anyqtaý úshin saqtandyrý derekteriniń bazasymen integratsiialanǵan júie qurylǵan. Sonyń kómegimen jyl basynan beri shetelden ákelingen kólikterdiń ústinen 460 myńǵa jýyq zańbuzýshylyq avtomatty rejimde anyqtalǵan.
«Bul sanattaǵy jol qozǵalysyna qatysýshylardyń tártibine qatysty másele bar. Mysaly, Shyǵys Qazaqstan oblysynda 182 myń teńgeniń 25 uiǵarymy rásimdelgen Lexus anyqtaldy. Ishki ister qyzmetkerleriniń aralasýymen búkil aiyppul tólendi. Qostanai oblysynda «VAZ» markaly bir kólikke 478 myń teńgeniń aiyppuly jazylǵan 51 uiǵarym rásimdelgen. Taǵy osy óńirde Qyrǵyz Respýblikasynda tirkeýde turǵan Toyota Estimo kóligine 91 ret jol qaýipsizdigin buzǵany úshin 1,1 mln teńge aiyppul salynyp, túgel óndirildi. Pavlodar oblysynda Reseide tirkeýi bar Hunday avtomobiliniń iesi 69 ret jol ejeresin buzyp, 751 myń teńge aiyppul tóledi», - dedi IIM ókili.
