Qarjy ministrligi kvazimemlekettik sektordyń satyp alýlary jónindegi zań jobasyn ázirledi. Bul týraly Bul týraly QR Qarjy ministri Erulan Jamaýbaev aitty, dep habarlaidy QazAqparat.
«Kvazimemlekettik kásiporyndardyń qarajaty memleketke tiesili, iaǵni ony únemdi ári tiimdi paidalaný - barlyǵymyzdyń mindetimiz. Sondyqtan olardyń satyp alý júiesin memlekettik satyp alýlar júiesine birizdendirip, jaqyndatý kerek. Osy turǵyda Qarjy ministrligi tiisti kvazimemlekettik sektordyń satyp alýlary jónindegi zań jobasyn ázirledi. Qazir zań jobasy Úkimette qaralyp jatyr», dedi ol Úkimet úiindegi ótken baspasóz máslihatynda.
Osy oraida ministr bir-eki aida atalǵan qujat Parlament Májilisiniń qaraýyna engiziletinin aitty.
«Bul zań jobasynyń memlekettik satyp alýdan ózgeshelikteri bar. Sebebi kvazimemlekettik sektorda kásiporyndar jumys isteidi, ónerkásipter bar, ol jerde qarjylyq ári banktik operatsiialar bar. Osy oraida memlekettik fýktsiialarǵa uqsamaityn operatsiialar bolǵandyqtan, zań jobasynda erekshelikter eskerilgen. Bul zań jobasynyń negizgi jańalyqtaryna toqtalsaq, birinshiden, kvazimemlekettik sektordyń barlyq sýbektilerine satyp alýdyń biregei erejelerin ornatý qamtylǵan. Ekinshiden, kvazimemlekettik sektor sýbektileriniń satyp alýlaryna qatysty memlekettik baqylaýdy kúsheitý jáne olarǵa qatysty ákimshilik jaýapkershilikti ornatý bolady. Úshinshiden, satyp alýdyń barlyq rásimderin 100 paiyz elektrondy tásilge aýystyrý (elektrondy sharttar, jumystyń oryndalýy jónindegi elektrondy aktiler, elektrondy shaǵymdaný, kameraldy baqylaý jáne t.b). qarastyrylǵan», - dedi E. Jamaýbaev.
