QR Premer-ministri Asqar Mamin qutqarýshylardyń zeinetke shyǵý jasyn qysqartý týraly zań normasy qaralyp jatqanyn málim etti, dep habarlaidy QazAqparat.
Bul týraly Úkimet basshysynyń depýtattyq saýalǵa bergen jaýabynda aitylǵan.
Onyń aitýynsha, Tótenshe jaǵdailar ministrligi «Qazaqstan Respýblikasynyń keibir zańnamalyq aktilerine azamattyq qorǵaý máseleleri boiynsha ózgerister men tolyqtyrýlar engizý týraly» zań jobasyn ázirlep jatyr.
Onyń aiasynda mynadai máseleler pysyqtalýda:
- azamattyq qorǵanys organdarynyń qyzmetkerlerine turǵyn úi tólemderin berý, jaýyngerlik is-qimyldarǵa jaqyndatylǵan jaǵdailarda jumys istegeni úshin ústemeaqylar tóleý;
- qutqarýshylardy azamattyq qorǵanys organdarynyń arnaiy shen beriletin qyzmetkeri qataryna qosý arqyly olardyń zeinetke shyǵý jasyn qysqartý;
- azamattyq qorǵanys organdarynyń qyzmetkerlerine qyzmet baby boiynsha qonys aýdarýmen bailanysty shyǵyndardy óteýge kóterme járdemaqy tóleý, múlkin tasymaldaý shyǵyndaryn óteý.
«Jalpy, azamattyq qorǵanys organdarynyń qyzmetkerleri men qutqarýshylaryn áleýmettik qamsyzdandyrý sharalaryn jaqsartý máselesi eldegi áleýmettik-ekonomikalyq jaǵdai men biýdjettiń múmkindikterine qarai qaralady jáne ýákiletti organ men Úkimettiń turaqty baqylaýynda», - dep túiindedi Asqar Mamin.
