Qutqarýshylar Tian-Shan taýynda joǵalyp ketken alpinisterdi izdeýge ushyp ketti. Bul týraly Tótenshe jaǵdailar komitetiniń resmi ókili Nursultan Nurahmetov aitty, dep habarlaidy "Ult aqparat".
Búgin tańerteń «Kazaviaspas» mekemesiniń Mi-171 borty Almaty oblysyndaǵy Qarqara alpinistik lagerinen izdestirý jumystaryn júrgizý úshin Qyrǵyzstanǵa ushyp shyqty.
«Bortta Ońtústik Inilshek bazasyna jetkiziletin úsh áskeri alpinist bar. Ary qarai olar jaiaý shyǵady. Izdestirý jumystaryna qyrǵyzstandyq alpinister toby da qosylady» , - dep habarlady komitet ókilderi.
