Mańǵystaý oblysynyń «Quryq» teńiz porty arqyly memlekettik shekarany kesip ótetin adamdarǵa PTR-testterdi qoldan jasap, satyp kelgen turǵyndar ustaldy, dep habarlaidy "Ult aqparat".
Bul týraly Ishki ister ministrliginiń resmi ókili Nurdildá Oraz vedomstvonyń aqparat alańynda ótken onlain brifingide aitty.
«IIM Tergeý departamentiniń áskeri-tergeý basqarmasy Mańǵystaý oblysynyń «Quryq» teńiz porty arqyly memlekettik shekarany kesip ótetin adamdarǵa PTR-testilerdi qoldan jasap, satýmen ainalysqan turǵyndardyń áreketin áshkereledi. Jedel-tergeý is-sharalary barysynda bir top adam, onyń ishinde osy teńiz portynyń feldsheri uzaq ýaqyt boiy PTR-testterdi qoldan jasap, qazaqstandyqtarǵa jáne shetel azamattaryna satyp otyrǵan», - dedi vedomstovnyń resmi ókili.
Onyń aitýynsha, 21 jastaǵy port feldsheri Qazaqstan aýmaǵyna shyǵatyn jáne kiretin jolaýshylar úshin PTR-testilerdi qoldan jasap, sybailastary arqyly satqan. Jalǵan testilerdiń baǵasy 3 000 teńgeden 10 000 teńgege deiin qubylyp otyrǵan.
«Turǵylyqty jeri boiynsha tergeý áreketterin júrgizý kezinde kúdiktiden satýǵa daiyn 48 jalǵan PTR-test, noýtbýk, printer jáne tiisti qujattar daiyndaýǵa qajet basqa da tehnikasy tárkilendi.
Atalǵan fakti boiynsha sotqa deiingi tergeý bastaldy. Onyń barysynda tergeý kúdiktilerdiń qylmystyq is-áreketiniń naqty aýqymy jáne memlekettik shekaradan zańsyz ótken adamdardyń sany anyqtalyp jatyr. Ishki ister ministrligi jalǵan qujat jasaǵany úshin 4 jylǵa deiin bas bostandyǵynan aiyrý túrindegi qylmystyq jaýapkershilik, al ony paidalanǵany úshin 40 táýlikke deiin qamaýǵa alý kózdelgenin eske salady», - dedi Nurdildá Oraz.
