Kúrdeli kezeńde áskeri mindettiler shette qalmaýy kerek. Bul týraly Túrkistan oblysy qoǵamdyq damý basqarmasynyń «Jastar resýrstyq ortalyǵy» KMM-niń basshysy Amalbek Ómirtai Strategy2050.kz tilshisine bergen pikirinde aitty.
«2014 jyly saltanatty ant qabyldap, 2014 jylǵy túlekter arasynda QazUÝ-diń áskeri kafedrasynyń jalaýyna ie bolǵan edim. Sol kezde vzvod komandiri bolǵam. Motoatqysh baǵytynda bilim alyp, jas jaýyngerdiń barlyq mashyqtaryn meńgergen bolatynmyn. Ol jaýapkershilikti tereń sezinemin. Memleketke tótenshe jaǵdai kezinde áskeri mindettilerdiń kómegi qajet bolyp jatsa, men, árine, azamattyq boryshymdy baryp óteýge daiynmyn. Qazirgi tańda qorǵanys, memlekettik organ qurylymdary barynsha jumys istep jatyr. Qashyqtyqtan jumys istep jatqandar ne bolmasa ýaqytsha jumyssyz qalǵan azamattar áskeri mindetterin atqarýǵa óz erikterimen barsa, bul atalǵan indetpen kúresýdi arttyrar edi», - dedi A.Ómirtai.
Sondai-aq, ol Jastar resýrstyq ortalyǵynyń jastary karantin jaǵdaiynda da aianbai eńbek etip jatqanyn jetkizdi.
«Oblys, aýdan kóleminde eriktilerdi jumyldyryp, qoǵamdyq jumystardy atqaryp jatyrmyz. Atap aitar bolsaq, Túrkistan jastary men kámelet jasqa tolǵan volonterlar arnaiy oqytý-mamandandyrý boiynsha tálim alyp, óz biliktilikterin «Túrkistan» temir jol vokzalynda is-tájiribe túrinde júzege asyrdy. Sondai-aq, eriktiler blok-beketterde tegin maskalar taratý jumystaryn júrgizdi. Aǵylshyn tilin onlain túrde tegin úiretýdi de júzege asyryp jatyr. Belsendi, patriot, erikti jastar óz úlesterin osylai da qosyp jatyr», - dedi ol.Amalbek Ómirtaidyń pikirinshe, tótenshe jaǵdai kezinde áskeri mindettilerdi jiynǵa shaqyrý durys.
«Biz «álem ne istep jatyr?» dep, olardyń tájiribelerine júgine bermei, ózimizdiń ulttyq tájiribemizdi oilap tabýymyz kerek. Túrkistan oblysy Ortalyq Aziiaǵa qaqpa bolǵannan keiin osyndai qarbalas kezinde, basqa da saiasi ahýaldardyń paida bolýyna bailanysty qorǵanysty kúsheitý kerek dep oilaimyn. Osy oraida Prezidenttiń tapsyrmasyn qoldap, kúrdeli kezeńde árbir áskeri mindetti adamnyń shette qalmaýyn qup kóremin», - dep túiindedi A.Ómirtai.
