Ortalyq kommýnikatsiialar qyzmetinde ótken brifingide joǵary sanatty infektsionist dáriger, meditsina ǵylymdarynyń kandidaty koronavirýs qurbandary «jasaryp» bara jatqanyn aitty, dep habarlaidy QazAqparat.
«Sońǵy aida, statsionarlyq kómekke degen qajettilik aitarlyqtai ósken kezde, elordada kún saiyn 300-den astam adam aýrýhanaǵa jatqyzyldy. Olardyń 10-15% reanimatsiiaǵa tústi. Kún saiyn birneshe adamnan aiyrylyp otyrdyq. Búgingi statistika da ońyp turǵan joq. Bir táýlikte Qazaqstan boiynsha koronavirýs infektsiiasy rastalǵan 149 adam qaitys boldy. Olardyń bári vaktsina almaǵan. 149 adam degenińiz bes qabatty, tórt podezdi úidiń turǵyn sanyman shamalas. Bir táýlikte tutas bir turǵyn úidiń adamy qaitys boldy degen sóz. Bulai kete berse, áli bir kúnde bir aýyldan, keiin bir shaǵynaýdannyń halqyna teń adamnan aiyrylamyz. Ol bireýdiń ata-anasy, bireýdiń balasy bolýy múmkin», - dedi infektsionist maman.
Dáriger indetpen reanimatsiiaǵa túskenderdiń arasynda tipti jasqa tolmaǵan sábilerdiń bar ekenin eske saldy.
«Elordada bir jasqa deiingi, balabaqsha jasyndaǵy balalar reanimatsiiaǵa, ókpeni jasandy jeldetý apparattaryna túsip jatyr. Biz 60-tan asqan naýqastardyń kóz jumatynyna boi úirete bastaǵan siiaqtymyz. Qazir 20-25 jastaǵy naýqastar da reanimatsiia tóseginen turmai qalyp jatyr. Bul óte qorqynyshty, ásirese balalar qaýipke dýshar», - degen maman keleshekte vaktsinanyń kapsýladaǵy túrleri de shyǵýy múmkin ekenin rastady.
«Vaktsinalar ekpe túrinde ǵana emes, kapsýla túrinde, basqa da formada bolýy múmkin. Biraq onyń Qazaqstanda paida bolýyn kútip otyrýdyń qajeti joq. Jańa ǵana aitqanymdai, kún saiyn bir turǵyn úidiń adamyn jerlegimiz kelmese, vaktsinatsiia múmkindigin barynsha paidalanýymyz kerek», - dedi Sáýle Atyǵaeva.
