Burynǵy Ulttyq ekonomika ministri Qýandyq Bishimbaev jazasyn budan bylai Shymkenttegi qaýipsizdigi ortasha túzetý mekemesinde óteitin boldy, dep habarlaidy "Ult aqparat" QR IIM Qylmystyq-atqarý júiesi komitetine silteme jasap.
«Sottalýshynyń advokaty men ata-anasynyń QAJ komiteti qanaǵattandyrǵan ótinimine sáikes, sottalǵan Bishimbaev jazasyn óteý úshin Shymkenttegi qaýipsizdigi ortasha 167/3-shi jazasyn óteý mekemesine aýystyrylady», - delingen komitettiń habarlamasynda.
Habarlanyp otyrǵandai, QR Qylmystyq-atqarý kodeksiniń 88-baby 2-bóligine sáikes, túzetý úshin jasalǵan jaǵdaidy esepke ala otyryp, áleýmettik mańyzdy bailanysyn, qaýipsizdigin qamtamasyz etip, jańa quqyq buzýshylyqtardan eskertý úshin bas bostandyǵynan aiyrylǵandar basqa mekemege aýystyrylady.
«Sottalǵan adamnyń jazasyn óteý ornyn aiqyndaý týraly sheshimdi aimaqtyq QAJ departamenti qabyldaidy. Basqa túzetý mekemesine aýystyrý kezinde sottalǵan Bishimbaevtyń múddeleri esepke alynatyn bolady. Qylmystyq-atqarý zańnamasy (QR QAK 89baby 4 bóligi) aiasynda qazirgi ýaqytta 167/3 jazasyn óteý mekemesinde bir jyldan artyq ýaqytqa bas bostandyǵynan aiyrylǵandar, qasaqana asa aýyr emes jáne aýyrlyǵy ortasha, aýyr qylmysty jasaǵandar, sonymen birge QR QAK-niń 96-baby 1-bóligi 1-tarmaǵy jáne 3- baby 2-tarmaǵy boiynsha sottalǵandar jazasyn ótep jatyr», - delingen habarlamada.
Eske sala ketsek, buǵan deiin sottalǵan ministrdiń qorǵaýshysy onyń jazasyn óteý tártibin ózgertýdi suraǵan bolatyn.
Aita keteiik, ótken jyldyń naýryz aiynda burynǵy Ulttyq ekonomika ministri men osy iske qatysty ózge de aiyptalýshylarǵa sot úkimi shyqqan edi. Sot úkimimen Qýandyq Bishimbaevtiń múlki tárkilenip, 10 jylǵa sottaldy. Sonymen birge, ol ómir boiyna memlekettik qyzmette jumys isteý quqyǵynan aiyryldy.
