HQKO-larda qujattandyrý qyzmetterin alý kezinde Salyq kodeksine sáikes, klientterdiń belgili bir sanaty memlekettik baj tóleýden bosatylady, dep habarlaidy QazAqparat Azamattarǵa arnalǵan úkimetke silteme jasap.
Qujattandyrý qyzmetteriniń qatarynda pasport, jeke kýálik, turý yqtiiarhaty jáne azamattyǵy joq adamnyń kýálikterin berý bar.
»Kodekstegi 622-bap, 4-tarmaq boiynsha memlekettik baj tóleýden bosatylatyndar:
• UOS ardagerleri jáne olarǵa teńestirilgen tulǵalar;
• Keńes odaǵynyń batyrlary jáne Sotsialistik eńbek erleri;
• barlyq toptaǵy múgedekter, sondai-aq múgedek balanyń ata-anasynyń biri;
• múgedekter men qarttarǵa arnalǵan mekemelerde turatyn egde jastaǵy adamdar;
• jetim balalar jáne balalar úilerinde nemese internattarda turatyn, ata-anasynyń qamqorlyǵynsyz qalǵan balalar;
• «Batyr Ana» ataǵyna ie bolǵan, «Altyn alqa» jáne «Kúmis alqa» tósbelgilerimen nagradtalǵan kópbalaly analar;
• Chernobyl apatynyń saldarynan zardap shekken azamattar», - dep jazdy vedomstvodan.
Bul sanattaǵy tulǵalar pasport nemese jeke kýálik alý úshin HQKO-ǵa júgingen kezde memlekettik baj tólemeýi tiis.
«Eger siz jeńildik sanatynyń ókili bola turyp, memlekettik baj salyǵyn qatelesip tóleseńiz, bul jaǵdaida aqshańyzdy qaitara alasyz. Ol úshin, eń aldymen, IIM aýmaqtyq organyna júginip, jeńildik sanatyn rastaityn qujatty usyný qajet. Organ sizge tólengen túbirtektiń talap etilmegeni týraly anyqtama beredi. Bul anyqtamamen HQKO-ǵa júginý kerek nemese sommany qaitarý úshin eGov arqyly ótinim berý qajet. Ótinish qabyldanǵannan keiin 5 jumys kúni ishinde klienttiń shotyna qate tólengen somma túsedi», - dep túsindirilgen habarlamada.
