Túrkistan oblysynda politsiia qyzmetkerleri áleýmettik jelilerge júrgizilgen monitoring barysynda kámeletke tolmaǵan jasóspirimniń avtokólik basqarǵanyn anyqtady, dep habarlaidy ult.kz.
Polisia.kz jazýynsha, tekserý nátijesinde Toyota markaly kóliktiń tizgininde júrgizýshi kýáligi joq jasóspirim otyrǵany belgili boldy. Politsiia málimetinshe, onyń ákesi ulynyń kólik júrgizýge quqyǵy joq ekenin bile tura, avtokólikti basqarýǵa ruqsat bergen.
Anyqtalǵandai, ákesi jasóspirimdi kólikpen dúkenge jumsaǵan.
Oqiǵaǵa bailanysty kámeletke tolmaǵan jasóspirim men onyń zańdy ókilderine qatysty qoldanystaǵy zańnamaǵa sáikes ákimshilik sharalar qabyldandy. Al kólik arnaiy aiyp turaǵyna qoiyldy.
Tártip saqshylary jol qozǵalysy qaýipsizdigin qamtamasyz etý baǵytyndaǵy jumystar turaqty túrde júrgiziletinin atap ótti. Sondai-aq azamattardy jol qozǵalysy erejelerin qatań saqtaýǵa jáne kámeletke tolmaǵandarǵa kólik basqarýǵa jol bermeýge shaqyrdy.
Politsiianyń eskertýinshe, mundai quqyq buzýshylyqtar jol qozǵalysynyń basqa qatysýshylaryna qaýip tóndirip, aýyr zardaptarǵa ákelýi múmkin.
