Foto: Sailaý Mailybaev
Senator Zakirjan Kýziev «Qazaqstan temir joly» ulttyq kompaniiasynyń ústinen tekserý júrgizip, Kólik ministrin palata depýtattarynyń aldyna keltirýdi surap depýtattyq saýal joldady, dep habarlaidy Kazinform agenttigi.
«Ókinishke qarai, Úkimet pen QTJ basshylyǵynyń búkil talpynysyna qaramastan temirjol holdingin tiimdiligi joǵary ete almadyq. Onyń ústine keiingi jyldary atalǵan salada birqatar salmaqty problemalar qordalanyp qaldy. Búkil el aýmaǵynda temirjol jelisi jetkilikti deńgeide damymai jatyr. Negizgi quraldardyń tozý kórsetkishi, jolaýshy tasymaldaý quramynyń tapshylyǵy, servis sapasyzdyǵy ósip jatyr. «QTJ» parkinde qazirgi tańda 2228 vagon bar. Onyń ishinde 776 vagonnyń nemese 35 paiyzynyń «jasy» 28 jyldan asyp ketken. Jolaýshy vagondarynyń ortasha tozý kórsetkishi – 53 paiyz, júk vagondarynda – 55 paiyz, al lokomotivterde 67 paiyzdan asyp ketken. Bul problema Qazaqstan arqyly ótetin tranzittiń tartymdylyǵyn kúrt nasharlatyp, kórshiles elderdi balama marshýrttar izdeýge májbúr etip otyr», - dep bastady ol saýalyn.
Aitýynsha, qazan aiynyń basynda senatorlarǵa Ulttyq ekspeditorlar qaýymdastyǵy shaǵymdanǵan.
«Olar óz ótinishinde «QTJ-Júk tasymaly» kompaniiasy eksport pen tranzit tasymalynyń negizgi jáne qosymsha josparlaryn maquldaýdan bas tartqanyn atap kórsetti. Al «Kedentransservis» jáne «KTZ Express» siiaqty óz ekspedirtorlarynyń jospary kedergisiz iske asyp jatyr», - deidi depýtat.
Senator Básekelestikti qorǵaý jáne damytý agenttigi de QTJ-nyń «óz» kompaniialaryna birqatar artyqshylyqtar beretinin anyqtaǵanyn eske saldy.
«QTJ qyzmetiniń túrlerine jasalǵan taldaý nátijesinde monopoliiaǵa qarsy organ qyzmettiń 424 túriniń tek 81-i, iaǵni 19% ǵana kelisilgeni anyqtaldy. Osylaisha, QTJ óz is-áreketterimen eksport tasymalynyń ondaǵan jyldar ishinde jolǵa qoiylǵan tehnologiiasyn buzyp, báseke teńsizdigin qalyptastyryp otyr.
Onyń magistral jelisindegi qozǵalysty josparlap, basqarýdyń tiimsiz ekeni aitylyp júr. Jyl basynan beri 400-den astam tasymal quramy jol orta qalǵan qalpy, qańtarylǵan. Jalpy saladaǵy avtomattandyrý deńgeii tómen. Al negizi QTJ-nyń negizgi tabys kózi júk tasymalynan túsedi – 86 paiyzdan astam. Saldarynan temirjolymyz ishki naryqta da, onyń syrtynda da básekege qabiletsiz bolyp otyr», - dedi Zakirjan Kýziev.
Senatorlar Kólik ministrligi men «Qazaqstan temir joly» UK» AQ-na birneshe ret depýtattyq saýal joldaǵanymen, máseleni sheshýge yqylasy joq salǵyrt jaýaptar kelge kórinedi.
«Júk jóneltýshiler men biznes sýbektileriniń kóptegen shaǵymdaryn eskere otyryp, sizden QTJ qyzmetine tekserý uiymdastyrýdy, sondai-aq Kólik ministrliginiń basshylyǵyn jáne buryn joldanǵan depýtattyq saýaldarǵa aýyzsha jaýap berý úshin QTJ basshylyǵyn Senatqa jiberýdi suraimyz», - dedi depýtat Senat depýtaty.
