Qazaqstan Respýblikasynyń Úkimeti ekonomikany turaqtandyrý boiynsha salyq saiasatynyń máseleleri jónindegi sharalar týraly qaýly qabyldady. "Ult aqparat" primeminister.kz silteme jasai otyryp qujattyń tolyq mátinin usynady.
Qazaqstan Respýblikasy Úkimetiniń 2020 jylǵy 27 naýryzdaǵy №141 Qaýlysy
«Ekonomikany turaqtandyrý jónindegi odan arǵy sharalar týraly» Qazaqstan Respýblikasy Prezidentiniń 2020 jylǵy 16 naýryzdaǵy № 287 Jarlyǵyn iske asyrý boiynsha salyq saiasatynyń máseleleri jónindegi sharalar týraly
«Ekonomikany turaqtandyrý jónindegi odan arǵy sharalar týraly» Qazaqstan Respýblikasy Prezidentiniń 2020 jylǵy 16 naýryzdaǵy № 287 Jarlyǵyna sáikes Qazaqstan Respýblikasynyń Úkimeti QAÝLY ETEDI:
1. 2020 jylǵy 1 qazanǵa deiingi kezeńge Qazaqstan Respýblikasy Úkimetiniń 2010 jylǵy 1 naýryzdaǵy № 145 qaýlysymen bekitilgen áleýmettik mańyzy bar azyq-túlik taýarlarynyń tizbesine qosylǵan taýarlardy ótkizý ainalymdaryn jasaǵan jáne olardyń importy kezinde qosylǵan qun salyǵynyń mólsherlemesi 8 % mólsherinde belgilensin.
2. Qazaqstan Respýblikasynyń aýmaǵynda eksportqa ótkiziletin benzin (aviatsiialyqty qospaǵanda), dizel otyny boiynsha aktsizdeletin taýarlardy óndirýshiler 2020 jylǵy 31 jeltoqsanǵa deiingi kezeńge aktsiz tóleýden bosatylsyn.
3. 2020 jylǵa týrizm, qoǵamdyq tamaqtandyrý jáne qonaqúi qyzmetteri salasynda kásipkerlik qyzmetti júzege asyrý kezinde paidalanylatyn salyq salý obektileri boiynsha zańdy tulǵalar men jeke kásipkerlerdiń múlkine salynatyn salyq mólsherlemelerine «0» koeffitsienti belgilensin.
4. Qazaqstan Respýblikasynyń Kásipkerlik kodeksine sáikes mikro, shaǵyn nemese orta kásipkerlik sýbektileri sanatyna jatqyzylǵan salyq tóleýshiler úshin:
- barlyq salyqtar men biýdjetke tólenetin basqa da mindetti tólemder, sondai-aq áleýmettik tólemder boiynsha tóleý merzimin 2020 jylǵy 1 maýsymǵa deiin uzartý berilsin;
- táýekel dárejesi joǵary salyq tóleýshilerdi qospaǵanda, salyq jáne keden bereshegin, sondai-aq áleýmettik tólemder boiynsha bereshekti májbúrlep óndirip alý sharalaryn jáne merziminde oryndalmaǵan salyq mindettemesin oryndaýdy qamtamasyz etý tásilderin qoldaný 2020 jylǵy 1 maýsymǵa deiin toqtatyla tursyn;
- táýekel dárejesi joǵary salyq tóleýshilerdi qospaǵanda, tótenshe jaǵdai kezeńinde (2020 jylǵy 15 naýryzdan bastap 2020 jylǵy 15 sáýir aralyǵynda) týyndaityn, «Salyq jáne biýdjetke tólenetin mindetti tólemder týraly» 2017 jylǵy 25 jeltoqsandaǵy Qazaqstan Respýblikasy Kodeksiniń (Salyq kodeksi) 114-baby 2-tarmaǵynyń 10) tarmaqshasynda kózdelgen habarlamany oryndaý merzimderi 2020 jylǵy 1 maýsymǵa deiin uzartylsyn;
- tótenshe jaǵdai kezeńinde memlekettik kirister organdary júzege asyratyn tekserýlerdi júrgizý merzimderiniń ótýi toqtatyla tursyn, bul rette toqtata turý merzimi tekserý merzimine kirmeidi.
5. Osy qaýly qol qoiylǵan kúninen bastap qoldanysqa engiziledi jáne resmi jariialanýǵa tiis.
Qazaqstan Respýblikasynyń
Premer-Ministri A. Mamin
