Qazaqstan Respýblikasy Prezidentiniń resmi Akorda.kz saity jańardy. Bul týraly búgin óziniń Facebook paraqshasynda Memleket basshysynyń baspasóz hatshysy Berik Ýáli jazdy, dep habarlaidy "Ult aqparat".
Resmi saittyń dizainy men qurylymy jańartylyp, ásirese, pandemiia jaǵdaiynda ózekti bolyp otyrǵan onlain-transliatsiialardy ótkizý múmkindigi iske qosyldy.
Qasym-Jomart Toqaevtyń Twitter áleýmettik jelisindegi resmi akkaýntyna jáne Prezidenttiń Baspasóz qyzmetiniń Facebook jelisindegi paraqshasyna siltemeler saittyń negizgi betinde kórsetilgen.
Saittyń tehnikalyq sipattamalary birshama jańartyldy.
«Atap aitqanda, platforma jańartylyp, veb-saittyń jyldamdyǵy artty, tutynýshylar úshin paraqshanyń ashylý ýaqyty qysqardy, saittyń ishki komponentteri, derekter qory jáne baǵdarlamalyq klasterler jumysynyń yńǵaily ári jedel bolýyn qamtamasyz etetin zamanaýi baǵdarlamalyq negizder ornatyldy.
Qaýipsizdik Keńesiniń jańalyqtary endi jańa taraýda jariialanady. Sonymen qatar muraǵattaǵy aqparattarǵa da qol jetkizý tetigi jetildirildi.
Qazaqstan Prezidentiniń saity sońǵy ret 2015 jyly jańartylǵan»,-delingen habarlamada.
