Strategiialyq josparlaý jáne reformalar agenttiginiń jáne ózge de memlekettik organdardyń bastamasymen reformalar jónindegi asa mańyzdy usynystardy qaraý jáne bekitý úshin Memleket basshysynyń Jarlyǵymen Prezident janyndaǵy Reformalar jónindegi joǵary keńes quryldy, dep habarlaidy "Ult aqparat" Aqordanyń baspasóz qyzmetine silteme jasap.
Prezident biylǵy 1 qyrkúiektegi Qazaqstan halqyna Joldaýynda ekonomika, ónerkásip, qarjy, áleýmettik jáne basqa da salalarda túbegeili reformalar júrgizý týraly mindetter qoidy. Bul máselede Memleket basshysynyń biylǵy 8 qyrkúiektegi Jarlyǵymen jańadan qurylǵan Strategiialyq josparlaý jáne reformalar agenttiginiń mańyzy zor.
Agenttik aǵymdaǵy jaǵdaidy, qalyptasyp otyrǵan tendentsiialardy, álemdik tájiribeni taldaý jáne osy negizde reformalardy iske asyrý tásilderin ázirleýdiń, sondai-aq, olardyń oryndalý barysyna monitoring júrgizýdiń jaýapty memlekettik organy bolady.
Agenttikpen jáne ózge de memlekettik organdardyń bastamasymen reformalar jónindegi asa mańyzdy usynystardy qaraý jáne bekitý úshin Memleket basshysynyń 2020 jylǵy 14 qyrkúiektegi Jarlyǵymen Prezident janyndaǵy Reformalar jónindegi joǵary keńes quryldy.
Prezident janyndaǵy joǵary keńes jumysynyń tiimdiligin arttyrý maqsatynda keńes quramyna Eýropalyq qaita qurý jáne damý bankiniń eks-prezidenti (2012-2020 j.j.) Sýma Chakrabarti engizildi.
Sonymen qatar Memleket basshysynyń 14 qyrkúiektegi Ókimimen S. Chakrabarti Qazaqstan Respýblikasy Prezidentiniń ekonomikalyq damý jónindegi shtattan tys keńesshisi bolyp taǵaiyndaldy.
S. Chakrabarti damýshy naryqtar máseleleri boiynsha maman, Ulybritaniia memlekettik qyzmeti júiesindegi iri reformalardy ázirleýde tájiribesi mol. Ortalyq jáne Shyǵys Eýropa elderine tehnikalyq kómek baǵdarlamasy – britandyq «noý-haý» qorynyń damýynda negizgi ról atqardy.
Eýropalyq qaita qurý jáne damý bankiniń basshysy retinde S.Chakrabarti atalmysh qarjy institýtyn aýqymdy jańǵyrýdan ótkizdi. Ózi basshylyq etken jyldary bul mekeme Qazaqstanǵa 9 mlrd dollar kóleminde investitsiia saldy. EQQDB memlekettik-jeke menshik áriptestikti, «jasyl ekonomika» men shaǵyn jáne orta biznesti retteý men damytýdyń jańa tásilderin ázirleýde mańyzdy konsýltativtik kómek atqardy.
S. Chakrabarti Eýropalyq qaita qurý jáne damý bankiniń basshysy bolǵan kezde Qazaqstan Respýblikasy Prezidenti janyndaǵy Shetel investorlary keńesiniń teń tóraǵasy boldy.
