Álihan Smaiylov Premer-ministr qyzmetine taǵaiyndaldy, - dep habarlaidy "Ult aqparat". Jarlyq Aqorda saitynda jariialandy.
"Álihan Ashanuly Smaiylov Qazaqstan Respýblikasynyń Premer-ministri laýazymyna taǵaiyndalsyn", - delingen Jarlyqta.
Aita keteiik, Memleket basshysy búgin Májilis otyrysyna qatysyp, Premer-ministr kandidatýrasyna Álihan Smaiylovty usyndy. Májilistegi úsh fraktsiia da onyń kandidatýrasyn maquldady.
Qatysyp otyrǵan 89 depýtat kandidatýrany qoldap daýys berdi. Toqaev jańa Premer-ministrge tabys tiledi.
Eske salsaq, 5 qańtarda eldegi jappai narazylyqtan keiin Prezident Úkimetti otstavkaǵa jiberdi. Premer-ministr mindetin ýaqytsha atqarý Álihan Smaiylovqa júktelgen edi.
Álihan Ashanuly Smaiylov 1972 jyly dúniege kelgen. 1994 jyly Ál-Farabi atyndaǵy Qazaq memlekettik ulttyq ýniversitetin "qoldanbaly matematika" mamandyǵy boiynsha támamdaidy. 1996 jyly QR Prezidenti janyndaǵy Qazaqstan menedjment, ekonomika jáne boljamdaý institýtynyń memlekettik basqarý magistri dárejesin alady.
Ár jyldary qarjy vitse-ministri, "QazAgro" Ulttyq holding prezidenti, statistika agenttiginiń tóraǵasy, Qazaqstan prezidentiniń kómekshisi, qarjy ministri qyzmetin atqardy.
Úkimet otstavkaǵa ketkenge deiin premer-ministrdiń birinshi orynbasary bolyp istedi.
