QR Premer-Ministri Asqar Mamin Qazaqstannyń Eýropalyq Odaqpen investitsiialyq yntymaqtastyǵy jónindegi dialogtyń 6-otyrysyn ótkizdi, dep habarlaidy primeminister.kz.
Úkimet basshysy QR ekonomikasyn damytý, iskerlik ahýaldy jaqsartý, investitsiia tartýdyń jańa tásilderin qabyldaý jáne sanitarlyq-epidemiologiialyq jaǵdaidy turaqtandyrý boiynsha qabyldanyp jatqan sharalar týraly aitty.
Premer-Ministr Úkimet qabyldap jatqan daǵdarysqa qarsy sharalardyń nátijesinde osy jyldyń basynan beri Moody's, Fitch jáne Standard&Poor's jetekshi reitingtik agenttikteri pandemiiaǵa deiingi reitingterin rastaǵanyn jáne 3,2-3,8% sheginde Qazaqstan ekonomikasynyń damýyna oń boljamdar bergenin atap ótti.
Sondai-aq Úkimet basshysy «Mura qory» amerikalyq zertteý ortalyǵynyń (Heritage Foundation) 2021 jylǵy Ekonomikalyq erkindik indeksi boiynsha elder reitinginiń naýryz aiyndaǵy jańartylýynda Qazaqstan óz kórsetkishterin 5 pozitsiiaǵa jaqsartyp, 178-den 34-orynǵa ie bolǵanyn atap ótti (2019 jyly – 59 oryn, 2020 jyly – 39 oryn). Oń dinamika fiskaldyq turaqtylyq, memlekettik shyǵyndardyń, sot júiesiniń tiimdiligi sekildi kórsetkishter boiynsha baiqaldy. Institýtsionaldyq orta sapasyn arttyrý faktorlarynyń arasynda investitsiialar, eńbek qatynastary jáne qarjy sektorynyń erkindigi atalǵan.
«Biz Qazaqstannyń investitsiialyq ahýaly neǵurlym qolaily elderdiń biri retindegi mártebesin odan ári arttyrý úshin osy serpindi damytýǵa niettimiz», — dedi A. Mamin.
Premer-Ministr Eýropalyq Odaq elshilerin Qazaqstannyń EO-men saýda-ekonomikalyq jáne investitsiialyq yntymaqtastyǵyn damytýǵa járdemdesý boiynsha odan ári ashyq jáne belsendi dialog ornatýǵa shaqyrdy.
Óz kezeginde, otyrysta sóz sóilegen EO elshisi Sven-Olov Karlsson, Italiia elshisi Paskal D'Avino, Avstriia elshisi Villi Kempel jáne Portýgaliianyń QR-daǵy ýaqytsha senimdi ókili Adelina Viieira Da Kýnia Da Silva Qazaqstannyń investitsiialyq ahýaldy jaqsartýdaǵy, biznesti júrgizý úshin qolaily jaǵdailar jasaýdaǵy eleýli progresin, sondai-aq EO-nyń QR-men ekonomikalyq yntymaqtastyqty odan ári arttyrýǵa múddeli ekenin atap ótti.
Taraptar pandemiia saldaryn eńserý jáne ekonomikany qalpyna keltirý máseleleri boiynsha Qazaqstannyń Eýropalyq Odaqpen yntymaqtastyǵynyń perspektivalaryn talqylady. Ulttyq jáne halyqaralyq deńgeide iskerlik ahýaldy odan ári jetildirý, meditsina salasyndaǵy ózara is-qimyldy keńeitý, sheteldik zańdy tulǵalarǵa qatysty salyqtyq ákimshilendirýdi jaqsartý, sot jáne sottan tys tetikter (tórelik) arqyly sheteldik kompaniialardyń qatysýymen daýlardy retteý máseleleri qaraldy.
EO qarjy institýttarymen yntymaqtastyqty damytýda jáne eýropalyq kompaniialardyń investitsiialaryn tartýda AHQO áleýetin arttyrýǵa erekshe kóńil bólindi. Kezdesýge QR Úkimetiniń músheleri, Strategiialyq josparlaý jáne reformalar jónindegi agenttiktiń, Básekelestikti qorǵaý jáne damytý agenttiginiń, «Kazakh Invest» UK» AQ basshylyǵy, QR Joǵarǵy sotynyń ókilderi, Eýropalyq Odaqtyń, Germaniia, Rýmyniia, Polsha, Belgiia, Italiia, Slovakiia, Ispaniia, Litva, Horvatiia, Grekiia, Bolgariia, Vengriia, Frantsiia, Avstriia, Latviia, Chehiia elshileri, Portýgaliia, Niderlandy, Finliandiia, Estoniia jáne t. b. ókilderi qatysty.
EO — Qazaqstannyń negizgi investorlarynyń biri jáne iri saýda seriktesi. 2020 jyly taýar ainalymy $23,6 mlrd qurady.
