Ishki ister ministri Erlan Turǵymbaev óńirlerdegi politsiia departamentteriniń birqatar nysandaryn aralady.
Bul týraly Ishki ister ministrliginiń baspasóz qyzmeti ótkizgen onlain brifingide aityldy, dep habarlaidy QazAqparat.
«Ótken aptada Ishki ister ministri Erlan Turǵymbaev Aqtóbe jáne Batys Qazaqstan oblystarynda jumys saparymen boldy. Ol óńirlerdegi politsiia departamentteriniń birqatar nysandaryn aralady. Sondai-aq, adam kóp jinalatyn jáne qylmys kóp jasalatyn aimaqtarda ornatylǵan jańa modýldik statsionarlyq politsiia beketterin qarap shyqty», - deidi QR IIM resmi ókili Nurdildá Oraz.
Onyń aitýynsha, ministr politsiia nariadtarynda táýlik boiy qyzmet atqarý jáne azamattardy qabyldaý úshin qajettiniń bári bar ekenine kóz jetkizdi. Sonymen qatar, politsiianyń jańa ýchaskelik beketterinde boldy.
«Erlan Turǵymbaev «Ákimdiktermen birlesip ýchaskelik inspektorlarǵa tiisti jaǵdai jasap, ýchaskelik pýnktter jelisin keńeite otyryp, biz azamattarymyzdyń qaýipsizdik deńgeiin arttyramyz. Mundai jumysty biz barlyq óńirlerde júrgizetin bolamyz» dep atap ótti», - deidi ol.
