QR Densaýlyq saqtaý ministri Eljan Birtanov №2 qalalyq kópbeiindi aýrýhana bazasyndaǵy katamnez jáne ońaltý bólimine (katamnez ortalyǵy) bardy. Ministr ortalyqtyń jumysymen tanysyp, meditsinalyq mekeme mamandarymen kóshpeli keńes ótkizdi, dep habarlaidy vedomstvonyń baspasóz qyzmeti.
Jiynda dúniejúzilik tájiribeni qoldana otyryp, múgedektik pen bala ólimin azaitý arqyly perinataldyq patologiiaǵa shaldyqqan balalardyń ómir súrý sapasyn jaqsartýǵa qatysty boldy. Erte shara qoldanylǵan jaǵdaida múgedektik pen bala ólimi azaiady. Bul shara QR 2019-2021 j.j. bala jáne sábi ólimin tómendetý boiynsha jedel is-sharalar josparynyń aiasynda kórinis tapqan.
Aita ketý kerek, №2 aýrýhanada katamnez bólimshesi biyl aqpan aiynda biýdjet negizinde ashylǵan. Álemdik praktikada perinataldyq patologiiaǵa shaldyqqan balalar statsionardan shyqqannan keiin jańa týǵan náresteler men 1 jasqa deiingi balalardyń ómir súrý sapasyn qoldaý men arttyrýǵa arnalǵan mamandandyrylǵan katamnez kabinetterinde baqylaýda bolady. Búginde bólimshe mamandary shala týǵan shaqalaqtardy kútýmen ǵana emes, sonymen qatar bolashaqta sábilerdiń densaýlyǵynyń odan ári nasharlaýyna jol bermeýge kómektesedi.
«Katamnez ortalyǵy» JShS direktory, joǵary bilikti sanatty neonatolog-dáriger Baljan Tátibekovanyń málimdeýinshe, qazir bólimshede jańa týǵan balalardy prospektivti jáne retrospektivti baqylaýda ustaidy.
Ortalyq QR 2019-2021 jyldary bala jáne sábi ólimin tómendetý boiynsha jedel is-sharalar josparynyń aiasynda balalardy ońaltý jáne reanimatsiialyq qyzmettiń tiimdiligin arttyrý maqsatynda qurylǵan.
Vedomstvo basshysy Qazaqstanda katamnestikalyq qyzmetti damytýdyń mańyzdylyǵyn atap ótti. E. Birtanovtyń aitýynsha, osyndai ortalyqtar atqaratyn fýnktsiialardyń mańyzdylyǵyn eskere otyryp, olardy barlyq jerde ashý qajet. Ministr osy máseleni sheshýdi tapsyrdy.
- Mundai ortalyqtardy qai óńirlerde qurýǵa bolatynyn anyqtaýymyz kerek, sarapshylardyń pikirinshe, olar balalar aýrýhanasy men perinataldyq ortalyqtarda ornalasqany durys. MSAK-pen tyǵyz bailanysta jumys istep jáne aqparattyq júiemen integratsiialanýy qajet. Sonymen qatar, mamandar jumys isteýi úshin hattama men standarttar bolýy tiis, dedi ministr. Buǵan qosa qajetti NQA daiyndaý, ortalyqtardy meditsinalyq jabdyqtarmen jáne meditsinalyq kadrlarmen qamtamasyz etý qajet ekenin eskerdi. Mundai ortalyqtar biýdjet esebinen qarjylandyratyn bolady.
