Qoja Ahmet Iasaýi kesenesin jáne tarihi tulǵalar jatqan oryndardy 3D-týr arqyly tamashalaýǵa bolady, dep habarlaidy "Ult aqparat".
QR Mádeniet jáne sport ministrliginiń málimetinshe, «Áziret Sultan» memlekettik tarihi-mádeni qoryq-mýzeiinde Android platformalaryna arnalǵan mobildik qosymsha iske qosylǵan. Qosymsha arqyly ǵasyrlar eleginen ótip, búgingi kúnge jetken kóne, tarihi qundy jədigerler men olardy saqtaý, qorǵaý, qaita qalpyna keltirý barysymen, qoryq-mýzeige qarasty tarihi-mádeni jáne rýhani oryndarmen tanysý jáne 3D-týr (http://dp.azretsultan.kz/) arqyly tamashalaý, ministrlik jańalyqtary men mýzeidiń atqaryp jatqan jumystary jónindegi aqparattar alý, tarihi eskertkishter jaily ǵylymi maqalalardy http://azretsultan.kz/ siltemesi arqyly tanysý múmkindigi qarastyrylǵan.
«Əziret Sultan» memlekettik tarihi-mədeni qoryq-mýzeii» RMQK-niń mobildi qosymshasyn Google Play Market arqyly júktep alýǵa bolady.
