"Jigitter" tobynyń ánshisi Erdos Qanaev ózi asyrap júrgen itinen aiyrylǵanyn aityp, áleýmettik jelide jan syryn aqtardy. Óner iesiniń sózinshe, belgisiz júrgizýshi janýardy kólikpen qaǵyp ketken. Bul jaǵdai ánshige aýyr tigen, dep habarlaidy ult.kz.
Erdos Qanaev Instagram jelisindegi jazbasynda tórt aiaqty serigine erekshe baýyr basqanyn jetkizdi. Ol úi janýaryn joǵaltqan adamnyń qaiǵysyn kópshilik birdei túsine bermeitinin de jasyrmady. Ánshi óziniń janýarlarǵa degen meiirimin ózgeler qalai qabyldaitynyna qaramastan, ishindegi ókinishin bólisýdi jón kórgen.
"Iá, men sondaimyn endi. Janashyrlyq bolar, meiirimdilik bolar. Bireýge kúlkili bolar. Pablik paraqshalar da jerden jeti qoian tapqandai jarysyp jazar", – dedi ol.
Óner iesiniń aitýynsha, eń aýyry – janýarynyń kólik astynda qalǵanyn óz kózimen kórýi.
"Mynaǵan ne boldy itti joqtap» deitinder de tabylar qazir. Biraq kóz aldyńda qańsylatyp, óltirip ketkeni aýyr tidi. «It dosyńa ainalsa jaqsy, biraq dosyń itke ainalsa jaman» deýshi edi. Jeti qazynanyń biri dep te beker aitpaǵan", – dep jazdy ánshi.
Erdos Qanaev itiniń ózine qanshalyqty jaqyn bolǵanyn da eske aldy. Onyń sózinshe, janýary kóńil kúii bolmaǵan sátterde qasynan tabylyp, únsiz ǵana qarap turatyn. Ánshi osy qarapaiym sátterdiń ózi qazir úlken saǵynyshqa ainalǵanyn ańǵartty.
Ol janýarlardyń adamǵa degen sheksiz adaldyǵyna erekshe toqtaldy.
"It baiǵusqa berilgen úlken bir nyǵmeti iesine adal bolýy eken. Keide adamnan osy qasiet ketkende, osy bir haiýannyń adaldyǵyn kórip ishimnen tańdai qaǵatynmyn. Netken adaldyq? dep", – dedi óner iesi.
Ánshi jazbasynyń sońynda itin qaǵyp ketken júrgizýshige de ún qatty.
"Meiirimsiz jan! Esik aldymnan áli talai ótersiń. Sol kezde qandai sezimde bolar ekensiń?", – dep jazdy ol.
Osylaisha, Erdos Qanaev ózi úshin jai ǵana úi janýary emes, adal serigine ainalǵan itinen aiyrylýdyń qanshalyqty aýyr ekenin jetkizdi.
Ázirge oqiǵaǵa qatysy bar júrgizýshiniń kim ekeni belgisiz. Sondai-aq ánshiniń quqyq qorǵaý organdaryna júgingeni týraly resmi málimet jariialanǵan joq.
Erdos Qanaev kim?
Erdos Qanaev – qazaqstandyq ánshi, kópshilikke "Jigitter" kvartetiniń múshesi retinde tanylǵan óner iesi. Ol Túrkistan oblysynyń Ordabasy aýdanyna qarasty Shubar aýylynda dúniege kelgen. Joǵary oqý ornynda qazaq tili men ádebieti pániniń muǵalimi mamandyǵy boiynsha bilim alǵan. Mektep qabyrǵasynda bolashaq ánshiler Erkin Nurjanov jáne Asqar Júnisbekovpen birge trio quryp, óner kórsetken. Sol kezderi Erdos pen Asqar dombyra, al Erkin baian aspabynda oinaǵan.
Onyń kásibi shyǵarmashylyq joly 2003 jyly qurylǵan "Jigitter" kvartetimen tyǵyz bailanysty. Sol jyly top "Arai" respýblikalyq baiqaýynda bas júlde ielengen.
Keiin kvartet "Erke qyz" ánimen tanylyp, 2006 jyly Almatyda alǵashqy jeke kontsertin ótkizgen.
Erdos Qanaev án oryndaýmen qatar, án mátinderiniń avtory retinde de belgili. Óner iesi telebaǵdarlamalar men suhbattarda otbasy, bala tárbiesi jáne adamgershilik qundylyqtary týraly oilaryn jii bólisedi.
