Foto: Aizada Agilbaeva/ Kazinform
Qaraǵandy oblysynyń ákimi Kostenko atyndaǵy shahtanyń elektr dánekerleýshisi Aibar Qosanovqa Memleket basshysynyń atynan «Eńbek Dańqy» ordenin tabys etti. Ol konveierlik shtrektegi tútindi jalǵyz ózi joiǵan bolatyn, dep habarlaidy "Ult aqparat" Kazinform-ǵa silteme jasap.
Esterińizge sala keteiik, 2 mamyr kúni keshke Kostenko atyndaǵy shahtadaǵy K3 qabatynyń 4-shi konveierlik shtregindegi tútin shyqqan bolatyn. Konveierlik shtrek ýchaskesiniń elektr dánekerleýshisi Aibar Qosanov alǵashqy órt sóndirý quraldarynyń kómegimen tútindi joidy.
Sonymen qatar shahtanyń basqarý bólmesinde tútin týraly eskertý júiesi de iske qosylǵan bolatyn. Tútin joiylǵanyna qaramastan, evakýatsiia josparyn engizý jáne 194 kenshini jer betine shyǵarý týraly sheshim qabyldandy. Aldyn ala boljam boiynsha, tútinniń paida bolýyna tómengi keneptiń roligine bógde zattyń túsýi, sonyń saldarynan roliktiń jumysy buǵattalýy sebep boldy. Bul konveier taspasynyń tútindeýine ákep soqqan.
Búgin el Prezidenti Qasym-Jomart Toqaev Kostenko atyndaǵy shahtanyń jerasty ýchaskesiniń elektr slesari Aibar Qosanovty III dárejeli «Eńbek Dańqy» ordenimen marapattady.
«Aibar tapqyrlyq tanytty. Ol shahtada bolýy múmkin qaiǵyly oqiǵanyń aldyn aldy. Eńbegińiz úshin raqmet, ata-anańyzǵa osyndai ul tárbielegeni úshin raqmet», - dedi Qaraǵandy oblysynyń ákimi Ermaǵanbet Bólekpaev.
Aita ketý kerek, 28 qazanda bul shahtada gaz-aýa qospasy jarylǵan bolatyn. Saldarynan 46 kenshi qaza tapty. Qaiǵyly oqiǵanyń áli izi sýi qoimaǵanany qaramastan, Aibar esh júreksinbesten, taǵy bir oqiǵanyń aldyn aldy. Shahta basshylyǵy onyń erligine riza.
«Aibar tez jinaqtalyp, shapshań áreket etti. 750 metrge deiin júgirip ótti. Bul – erlik. Eger ol bolmasa, oqiǵa saldaryn boljaý múmkin bolmas edi. Ol arnaiy daiyndyqtan ótken joq, sondyqtan ol jerge barýǵa mindetti emes edi. Biraq qaýipke qaramai, áriptesterin qutqardy», - deidi Kostenko shahtasynyń direktory Denis Dymov.
«Men tútin týraly estigen boida birden 700 metr tómenge qarai júgirdim. Tútindi kórgende eki órt sóndirgishti alyp, oshaqqa qarai bardym. Ol kezde eshteńe oilamadym. Men tek adamdardy qutqarǵym keldi. Tipti, otbasym týraly da oilamadym», - deidi Aibar Qosanov.
Aibar Qosanov 38 jasta. Ol Shet aýdanynyń týmasy. Kostenko shahtasynda qyzmet etip jatqanyna úsh jyl boldy. Jubaiymen eki bala tárbielep otyr.
