Qostanai oblysynda qymbat múlikti zańsyz iemdenip ketken alaiaqtar izdestirilip jatyr, dep habarlaidy "Ult aqparat" oblystyq politsiia departamenti baspasóz qyzmetine silteme jasap.
Qostanai oblysy politsiia departamentiniń bastyǵy Beket Aimaǵambetovke Qazaqstan men Resei arqyly júk tasymaldaityn kólik firmasynyń iesi ótinish bildirdi. Ol internet-alaiaqtardyń qurbany bolǵanyn aitqan. Kásipker internetten «kólik júrgizýshisin» taýyp, kelisim-shart jasasqan. Alaida qymbat júk dittegen jerine deiin jetpegen.
«Olardyń barlyǵy Qostanai qalasynyń turǵyny, olardyń bireýin bilemin, sondyqtan da olarǵa senip edim. Quny 50 million teńgeden asatyn júk Óskemennen Reseige jetkizilýi tiis edi. Arada kelisim-sharttyń baryna qaramastan, alaiaqtar orta jolda telefonǵa jaýap bermedi», - deidi kásipker.
Kásipker tanysy arqyly óz múlkiniń Reseidiń basqa qalasyna jetkizilgenin anyqtaǵan.
Politsiia departamenti bastyǵynyń nusqaýy boiynsha bul qylmysty tergeý úshin arnaiy jedel-tergeý toby quryldy.
«Arnaiy top Qazaqstannyń birneshe oblysynda tergeý júrgizedi. Bul alaiaqtyqtyń óte sirek tásili, tergeý jumystarymen tájiribeli politsiia qyzmetkerleri ainalysady», - dep atap ótti general Aimaǵambetov.
Jyl basynan beri vedomstvo basshysynyń jeke qabyldaýyna 200-den astam azamat júginse, olardyń máseleleri sheshilip, zań keńesteri berilgen.
