Tarihty bilmei bolashaqqa baǵdar jasaý áste múmkin emes. Sondyqtan adamzat balasy úshin keshegi kúnnen syr shertetin kez-kelgen mura qundy. Sebebi, ótkenge kóz jiberip, tarihty tarazylaýǵa kóneden jetken jádigerlerdiń qosatyn úlesi orasan.
Qundy murany jinap, kózdiń qarashyǵyndai saqtaityn, onyń keleshek urpaqqa búlinbei jetýin qamtamasyz etetin birden-bir mekeme mýzei bolyp tabylady. Elordadaǵy Qazaqstan Respýblikasynyń Ulttyq mýzeii 2015 jylǵy 18 naýryzda «Ulttyq mýzeige syi tartý» atty aktsiia bastaǵan bolatyn. Maqsaty – ulttyq tarihi-mádeni muralarymyzdy saqtaý máselesine qoǵam nazaryn aýdartyp, el ishinde eleýsiz jatqan tarihi mańyzy zor qundy zattardy, ultymyzdyń tanymal tulǵalarynyń jádigerlerin kásibi turǵyda saqtaý jáne kópshilik nazaryna usyný.
Aktsiia osyǵan deiin Astana, Almaty, Qyzylorda, Aqtóbe, Shymkent qalalarynda ótti. Nátijesinde Ulttyq mýzeidiń qory nebir qundy jádigerlermen tolyǵyp keledi. Kenen Ázirbaevtyń dombyrasy, Qasym Qaisenovtiń kezdigi, Shámshi Qaldaiaqovtyń kúlsalǵyshy, Jumeken Nájimedenovtiń partsigary men diplomaty, Jumabek Táshenovtiń ordenderi, Qadyr Myrzalievtiń qalamsaby men qolsaǵaty, Jaqsylyq Úshkempirovtiń medaldary men jarystarǵa kigen kiimderi, mine, osynyń barlyǵy «Ulttyq mýzeige syi tartý» aktsiiasynyń aiasynda jinalǵan zattar.
Dál osy igi bastama Qostanai qalasynda jalǵasyn tapty. Óz kezeginde astyqty aimaqtyń turǵyndary da Ulttyq mýzeige qundy jádigerlerin tartý etti. Aktsiiaǵa Torǵai óńiriniń tarihta aty qalǵan tanymal tulǵalarynyń urpaqtary men týǵan-týystary qatysyp, mýzei úshin qundy degen kóptegen buiymdaryn usyndy.
Ulttyq mýzei direktory Darhan Myńbai aktsiiaǵa qatysqan qostanailyqtarǵa alǵys bildirip: «Mýzeige jai ǵana ǵimarat retinde qaramai, oǵan jan bitirýimiz kerek. Mýzeige kelýshiler sol arqyly rýhtanyp, bizdiń tamyry tereń tarihymyzdan mol maǵlumat alýy tiis. Sol úshin de osy aktsiiany uiymdastyryp, qundy jádigerlerdi Ulttyq mýzeige jinap jatyrmyz. Onyń ústine bizdiń mýzeige jyl saiyn myńdaǵan sheteldikter kelip, eksponattardy tamashalaidy. Barlyǵyn bir ortalyqqa toptastyrý arqyly biz sol týristerdiń de bizdiń tarihymyz ben mádenietimizdiń mol murasynan sýsyndaýyna jaǵdai jasaimyz. Endigi jerde Tobyl, Torǵai dalasynyń perzentteriniń qundy eksponattaryn álem nazaryna usyna alamyz», - dedi.
Qostanai óńirinde ótken aktsiia barysynda Ulttyq mýzeidiń qory 200-ge jýyq eksponatpen tolyqty. Jádigerlerdiń arasynda Ǵafý Qaiyrbekovtyń qoljazbalary men qalamsaby, akademik Shaýqat Altaevtyń Elbasynyń qolynan alǵan qolsaǵaty jáne kóptegen medaldary, Qazaqstannyń halyq artisi Qapan Badyrovtyń qoljazbalary men fotosýretteri bar. Budan bólek Qazaqstannyń halyq aqyny Ásiia Berkenovanyń dombyrasy, jýrnalist Qaisar Álimniń kitaptary, ekonomist-ǵalym Kenjeǵali Saǵadievtiń ǵylymi eńbekteri de Ultyq mýzei eksponattarynyń qataryna qosyldy. Rio Olimpiadasynyń qola júldegeri Ivan Dychko da aktsiiaǵa atsalysyp, óziniń sporttyq kiimi men bylǵary qolǵabyn Ulttyq mýzeige tartý etti. Biyl 110 jyldyq mereitoiy toilanyp jatqan Mariiam Hakimjanovanyń urpaqtary aqynnyń jeke zattary men kózáinegin Ulttyq mýzeige usyndy. Jergilikti qylqalam sheberleriniń qolynan shyqqan óner týyndylary da mýzei qoryna alyndy. Elýbai Ómirzaqov atyndaǵy oblystyq filarmoniiada aktsiia barysynda jinalǵan eksponattardan kórme qoiylyp, qonaqtardyń nazaryna usynyldy.
«Ulttyq mýzeige syi tartý» – jai ǵana aktsiia emes elimizdiń tarihy men mádenietine ólshýsiz úles qosatyn biregei joba. Respýblikalyq deńgeide josparlanǵan aktsiia elimizdiń ózge óńirlerinde de uiymdastyrylyp, jalǵasy tabatyn bolady.
Dosjan YSQAQ
Ulttyq mýzeidiń Jurtshylyqpen
bailanys jónindegi mamany
Ult portaly
