Qostanai qalasy ákimdiginiń bilim bólimi mektep oqýshylary men olardyń ata-analaryna óńirde aýa raiy jaǵdaiynyń nasharlaýyna bailanysty habarlama taratty, dep habarlaidy QazAqparat.
«Aýa raiy jaǵdaiynyń nasharlaýy: jeldiń kúsheiýi, qalyń qardyń túsýi jáne joldyń durys kórinbeýine bailanysty 2021 jyldyń 27 jeltoqsanynda Qostanai qalasy mektepteriniń ekinshi aýysym oqýshylary qashyqtan oqytý formatyna aýystyrylady. Birinshi aýysymda oqityn balalar úshin sabaqtardy qysqartý usynylady», - delingen habarlamada.
Sondai-aq, aýa raiynyń qalyptasqan jaǵdaiyna bailanysty júrgizýshiler men jaiaý júrginshilerge tártip saqshylary eskertý jasady.
«Jaýyn-shashynnyń mol túsýi jol qozǵalysyn qiyndatyp otyr. Osynyń barlyǵy kólik quraldarynyń qozǵalysyna keri áserin tigizip, jol-kólik oqiǵalaryna ákelip soqtyrady. Osylaisha, Qostanaidyń ózinde ǵana bir táýliktiń ishinde 30 jol-kólik oqiǵasy oryn alǵan. Osyǵan bailanysty júrgizýshiler men jaiaý júrginshilerge eskertý jasaimyz – jolda asa muqiiat bolyńyzdar. Júrgizýshilerge úlken qashyqtyqtaǵy jolǵa shyǵýdan bas tartýyn suraimyz», - dep habarlady Qostanai oblysy politsiia departamentinen.
Vedomstvo osyndai kún raiynda kólik júrgizý stilin aýystyrý kerek ekenin eske saldy.
«Jaiaý júrginshiler, sizder de joldan ótý kezinde nemese jol jiegimen ótip bara jatqanda asa abai bolyńyzdar. Júrgizýshiler men jaiaý júrginshilerge jol qozǵalysy erejelerin saqtaýyn suraimyz, sebebi bul – sizdiń ómirińiz ben densaýlyǵyńyz», - dep qorytyndylady PD-dan.
